Jambyldaǵy jarylys kezinde jaraqattanǵan áskerı qyzmetshi qaıtys boldy
Oq-dárilerdi saqtaý bóliminiń basshysy qyzmetin atqarǵan áskerı qyzmetshi aýrýhanada jan tapsyrdy. Resmı aqparat Gov.kz jarıalanǵan, dep habarlaıdy almaty-akshamy.kz.
Qorǵanys mınıstrliginiń resmı habarlamasy boıynsha, 7 qyrkúıekte Taraz qalalyq aýrýhanasynda 26 tamyzda Jambyl oblysyndaǵy oq-dáriler qoımasynda bolǵan órtti sóndirý kezinde alǵan jaraqattarynyń saldarynan 28349 áskerı bóliminiń áskerı qyzmetshisi 1983 jyly týǵan, kapıtan Erlan Rysqulbekuly Qyrǵyzálıev qaıtys boldy.
Ol oq-dárilerdi saqtaý bóliminiń bastyǵy laýazymyn atqarǵan bolatyn. Qoımadaǵy órtti joıýǵa kirisken alǵashqylardyń biri boldy.
«Qorǵanys mınıstrligi marqumnyń týystary men jaqyndaryna qaıǵyryp kóńil aıtady», - delingen habarlamada.
Jambyl oblysynda bolǵan jarylys saldarynan qaza bolǵandar sany 16-ǵa jetti. Taǵy bir adam izdestirilip jatyr.