Pákistandyq áskerı qyzmetshiler mundaı saparlarǵa óńirmen, áskerı oqý oryndarynyń tynys-tirshiligimen tanysý jáne baılanys ornatý maqsatynda Ortalyq Azıa elderi boıynsha jyl saıynǵy týr sheńberinde shyǵady.
Sheteldik delegasıanyń basshysy áskerı kolej kafedrasynyń bastyǵy brıgadalyq general Vasım Kýasır mundaı kezdesýler tanymdyq jáne praktıkalyq turǵydan paıdaly ári kýrsanttarǵa tájirıbe men bilim almasý múmkindigi dep sanaıdy, dep habarlaıdy Almaty-akshamy.kz Qorǵanys mınıstrligine silteme jasap.
Pákistandyq kýrsanttar QR Qorǵanys mınıstrliginiń Saǵadat Nurmaǵambetov atyndaǵy Áskerı kolejinde turyp, arnaıy daıarlyq synyptaryn, ulandar úırenetin qarý-jaraq pen áskerı tehnıkany tamashalady.
Qonaqtar sonymen qosa Keńes Odaǵynyń Batyry, Halyq qaharmany armıa generaly Saǵadat Nurmaǵambetov atyndaǵy kitaphanaǵa, murajaıǵa, bardy. Bul rette olar voleıbol, shahmat jáne ústel tenısi sıaqty sport túrlerinde qazaqstandyq qurdastarymen básekelesý múmkindigin de jibergen joq.
Pákistannan kelgen delegasıa músheleri Ulttyq áskerı-patrıottyq ortalyǵyna baryp, Qazaqstan Qarýly kúshteri Memlekettik áskerı-tarıhı mýzeıiniń zaldaryna ekskýrsıa jasady.
Bul sapar jaıly kýrsanttardyń elordanyń kórikti jerlerinde túsken fotolary men Qazaqstannyń rámizderi bar kádesyılar eske túsirip turatyn bolady.