Keshe qalyń qazaq aza tutty.
Búgin jer astynda kóz jumǵan kenshilerdi jerleý bastaldy. Marqumdardy jerleý úsh kúnge sozylady.
Qara jamylǵan Qaraǵandy halqymen birge eldiń muńyn júreginen ótkizetin aqyndar da qaıǵyryp, aza jyrlaryn arnady.
Ǵalym JAILYBAI
QARAǴANDY...
Qasiret jyry
Týlaq sabap jatqandaı
tasqa aýnatyp,
Qaraǵandy kóginen qashqan baqyt...
...Sherýbaı-Nura «Shermende» kúıin shaldy –
Soqyr ózen kózinen jas parlatyp.
Saǵym alyp qashqandaı samalańdy,
Qý taqyrǵa shógerdiń qara nardy.
Zarlap kóshken jurt ediń,
«KarLag» keshken –
Saǵan endi ne deıin, Qaraǵandy?
Qazan tańy,
Qaıǵymnyń qozǵap bárin,
Aqqýdy attyń,
eı, ajal,
qazdy atpadyń.
– Kómir berem – dep júrip
Ómir bergen –
Baquldaspaı qaıtemin, bozdaqtarym!
Samaly arly, Saryarqa,
sanań arly,
Geptıl jaýyp qurdastyń qany aǵardy...
Janaryńnan taǵy da jas saýlady –
Qabaǵyńnan qar jaýǵan, Qaraǵandy!
Tereńime terbelgen batty ýaıym,
Qanatyńdy qarǵam-aı,
Qaqtyraıyn.
...Aq Ordańnyń ishine jibek jaıyp –
Kúmis sapty ojaýmen aq quıaıyn.
Jaılaýyndaı janyńnyń jaz álemi,
Nazy ádemi jurt ediń,
sazy ádemi.
...Qaraly tý kótergen, Qaraǵandy –
Birge búgin ózińmen, Qazaq Eli!
Qaırat ASQAR
Kıesi qashty ma jat ozǵan tórińniń...
Shahta ma - mekeni qazylar kórińniń?
Azap pa eńbegiń, joq álde tozaq pa -
Tirideı órtenip, tirideı kómildiń.
Ólkem bar óte baı, nege ózim kedeımin?..
Ózegim órtengen, óksigen ógeımin.
Sen endi úıińe jarqyldap qaıtpaısyń,
Jaýtańkóz jaryńa, balańa ne deımin?!.
Ynsapsyz kelimsek yqtıar, yrqyn ap,
Kendi ólkeń - azaly, saı-súıek syrqyrap.
Jap-jaryq álemdi bir kórgiń keldi me
Shyńyraý tereńde shybyn jan shyrqyrap?
Bolsań da bıikke, aspanǵa tym qushtar,
Qara jer jibermes qaharly bir kúsh bar...
Qazady qashanǵy tirideı kórińdi
Kúnáhar qoldarmen jasalǵan qylmystar?!.
Mıras ASAN
Aza jyry
Aza tutamyn ańyrap,
Qara jamylam qańyrap.
Opyrylyp túsken shahta emes –
45 qara shańyraq.
Aza tutamyn azapta,
Túsken joq janym az otqa.
Paıdaly qazba degender,
Paıdasyz bop tur qazaqqa...
Áshkere boldy kóp kemim,
Júregim –jalyn, ot – demim.
Qara jamylǵan kók Týǵa,
Qaraýǵa dátim joq meniń!
Taıǵaqpen júrdim, jol turyp,
Oǵlandarymdy óltirip...
Qazylǵan kómir orynyn,
Qazamen japtym toltyryp!
Aza tutamyn, Haq kórse,
Kegimdi ketken ap berse.
Maqtaýdan ońaı nárse joq,
Joqtaýdan qıyn joq nárse.
Soramdy ý ǵyp jutamyn,
Qaýsadym,
Shóktim,
Jutadym.
Men endi óleń jazbaımyn,
Men endi aza tutamyn...
Janat JANQASH
Qara jerdiń astynda,
Qurbandar kómir qazyp jatady,
Jer betindegi bylshylmen joq múlde shataǵy.
Ún-túnsiz, toqtaýsyz burǵylap,
Ún-túnsiz tunjyryp,
Ketkendeı taǵdyrdyń tataýy.
Qurbandar, jer qazyp jatady, burǵylap,
Máńgige sónbeıtin beınedeı bul biraq.
Jer astynda bireýler ún-túnsiz júredi,
Jerdiń tamyryna qatqan qandy urǵylap.
Jer astyna Kún alyp shyǵýǵa kirgender…
Qurbandar súıegimen shegendep, bekitedi irgeńdi el.
Kómirdiń qyp-qyzyl otyna qyzyǵa qaraıtyn adamdar,
Bul alaý – QURBANDARDYŃ QANY ekenin umytyp ketip júrmeńder.
Qurbandar jer qazyp, jatady…