Almaty oblysy agrarlyq-ındýstrıaldy aımaq bolǵandyqtan, óńdeýshi sektorǵa, onyń ishinde aýyl sharýashylyǵy ónimderin qaıta óńdeýge basymdyq beriledi. Bul týraly baspasóz jıynynda oblys ákimi Marat Sultanǵazıev málim etti.

«Almaty oblysy elimiz boıynsha qus basynyń sany men qus etin óndirýden kósh bastap tur. Qoı men eshki sany jóninen jáne júgeri, kókónis, jemis-jıdek daqyldary men kartop ósirýden respýblıkada alǵashqy úshtikke kiredi. Al balyq sharýashylyǵy taýarly balyq óndirisiniń kólemin ulǵaıtýǵa jáne ımportty almastyrý úshin daıyn ónim shyǵarýǵa baǵyttalyp otyr. Ótken jyly 5 myń tonnaǵa jýyq balyq óndirildi. 2030 jylǵa qaraı bul kórsetkishti 17 myń tonnaǵa jetkizý josparlanyp otyr», - dedi oblys ákimi.

Óńir basshysynyń sózinshe, bıyl agroónerkásiptik keshendi qoldaýǵa 34 mlrd teńgeden astam qarajat qarastyrylǵan. Byltyr aýyl sharýashylyǵynyń jalpy ónim kóleminiń kórsetkishi 736,5 mlrd bolsa, osy jyly onyń kólemin 2,6% ósimmen 840 mlrd teńgege deıin jetkizý josparlanyp otyr.

«Almaty oblysynyń asyl tuqymdy mal sharýashylyǵyn damytý» biregeı óńirlik baǵdarlamasy ázirlenip, iske asyrylýda. Oǵan jergilikti búdjetten 6 mlrd teńge qarjy bólinip, 820 bas asyl tuqymdy iri qara jáne 4 myńnan astam asyl tuqymdy usaq mal satyp alynǵan. Osylaısha, 2027 jylǵa qaraı iri qara asyl tuqymdy mal basynyń úlesin 19,5%-dan 25%-ǵa deıin, usaq mal basyn 16,7%-dan 20%-ǵa deıin ulǵaıtý josparlanýda. Osy atalǵan sharalardyń barlyǵy oblys halqynyń azyq-túlik qaýipsizdigin qamtamasyz etýge jáne megapolıstiń aınalasynda azyq-túlik beldeýin qurýǵa baǵyttalǵan», - dedi Marat Sultanǵazıev.

Budan bólek, óńirde 157 myń gektar jer memleketke qaıtarylǵan. Oblys kóleminde sýarý jelilerin qaıta jańartý jumystary jalǵasýda. Nátıjesinde 57 myń gektarǵa jýyq sýarmaly jer qalpyna keltirilipti.