Almatydaǵy Eýrazıa ǵylymı-zertteý ınstıtýtynda Ázirbaıjan Respýblıkasy Ulttyq Májilisiniń depýtaty ári Mádenıet komıtetiniń tóraıymy Ganıre Pashaevamen kezdesý ótti.
Profesor, ǵylymı doktory Ganıre Pashaevanyń elimizdegi ulttyq ýnıversıtetter men mádenı jáne ǵylymı ortalyqtarǵa jasaǵan sapary Geıdar Álıevtiń 100 jyldyǵyna oraı ótýde. Atalǵan kezdesý taqyryby da «Geıdar Álıevtiń 100 jyldyǵynda Túrki álemi» dep atalady.
Kezdesýde Ganıre hanym óz saparynyń maqsaty jáne Túrki memleketteri arasyndaǵy bilim men mádenıet salasyndaǵy qarym-qatynastarǵa, ótkeni men búginine toqtalyp ótti. Sondaı-aq, Túrki áleminiń qazirgi ıntegrasıasyna qatysty oılarymen bólisti.
«Qazirgi túrki memleketteriniń ózara ıntegrasıalyq baılanystarynyń damýy memleket basshylarynyń saıası erik-jigerlerine tikeleı baılanysty», – dedi Genıre hanym.
Sharaǵa sońynda qatysýshylarǵa Ganıre Pashaeva qazaq tilinde jaryq kórgen jyr jınaǵyn tartý etti.