Til saıasaty komıtetiniń málimetinshe, qazaq tilinde sóıleıtin ózge ult ókilderiniń sany artyp keledi.
Ǵylym jáne joǵary bilim mınıstrligine qaraıtyn Til saıasaty komıteti Ashyq NQA portalynda Qazaqstan Respýblıkasynda til saıasatyn damytýdyń 2023-2029 jyldarǵa arnalǵan tujyrymdasynyń jobasyn qoǵam talqysyna usyndy.
Jobada Qazaqstandaǵy qazirgi tildik ahýalǵa sıpattama berilgen.
«Qazaqstanda azamattardyń tildik quzyrettiligi ártúrli qalyptasyp otyr. Atap aıtqanda, qazaqtildiler, qazaq-orystildiler, orystildiler, etnıkalyq qazaqsha, etnıkalyq oryssha tildiler nemese etnıkalyq oryssha-qazaqsha úsh tildi biletinder jáne qazaq-orys-aǵylshyn úsh tildi meńgergender», – dep jazylǵan tujyrymdama jobasynda.
Til saıasaty komıtetiniń málimetinshe, Qazaqstanda qazaq tilinde sóıleıtin azamattardyń sany artyp keledi.
Qazaqstanda turatyn ózge ult ókilderiniń qazaq tilinde oqı, jaza jáne sóıleı alatyndarynyń úlesi tómendegideı:
Túrkitildes halyqtardyń ishinde:
- ózbekterdiń 72 paıyzy;
- uıǵyrlardyń 71,7 paıyzy;
- qyrǵyzdardyń 58,5 paıyzy qazaq tilinde sóıleı alady.
Bul ulttardyń 12 paıyzy qazaqsha oqyp, jazýdy joǵary deńgeıde meńgergeni anyqtalǵan.
Slaván dıasporasy ishinde:
- orystardyń 25,1 paıyzy;
- ýkraındardyń 23,7 paıyzy;
- belorýstardyń 22,8 paıyzy;
- poláktardyń 22,1 paıyzy;
- nemis dıasporasynyń 25,2 paıyzy aýyzeki qazaq tilin túsinedi.
«Atalǵan dıasporalar ishinde qazaqsha oqyp, jaza biletinder úlesi – 2,9 paıyzdy quraıdy. Kórsetilgen sandyq ózgerister memlekettik til qoldanysynyń sapasyn áli de bolsa jaqsartýdy talap etedi», – dep jazylǵan tujyrymdama jobasynda.