Qazaqstandaǵy taýar aınalymynyń jalpy kólemi 134,4 mıllıard dollarǵa jetken
Memleket basshysy Qasym-Jomart Toqaev Premer-Mınıstrdiń orynbasary – Saýda jáne ıntegrasıa mınıstri Serik Jumanǵarındi qabyldady, dep habarlaıdy Almaty-akshamy.kz Aqordanyń baspasóz qyzmetine silteme jasap.
Prezıdentke elimizdiń saýda salasynyń byltyrǵy damý qorytyndysy, Úkimettiń baǵany turaqtandyrý jáne qazaqstandyqtardy otandyq azyq-túlikpen tolyq qamtamasyz etý jónindegi sharalary týraly baıandaldy, sondaı-aq aýyl sharýashylyǵyn damytýǵa qatysty usynys berildi.
Serik Jumanǵarınniń aıtýynsha, 2022 jyly Qazaqstandaǵy taýar aınalymynyń jalpy kólemi 134,4 mıllıard dollarǵa jetken. Bul kórsetkish 2021 jylmen salystyrǵanda 32,1 paıyzǵa kóp. Qyzmet kórsetý saýdasy 26,3 paıyzǵa ósip, 12,3 mıllıard dollardy qurady. Qazaqstannyń barlyq negizgi saýda seriktesimen ózara taýar aınalymynda ósim baıqalady.
Óńdelgen ónimder eksporty 26,5 mıllıard dollardy qurap, buryn-sońdy bolmaǵan kórsetkishke jetti. Tereń óńdelgen eksport taýarlarynyń tizimi keńeıip, otandyq taýarlar jańa eksport naryqtaryna shyqty.
Qasym-Jomart Toqaevqa áleýmettik mańyzy bar azyq-túlik taýarlarynyń otandyq óndirisiniń jaǵdaıy týraly aıtyldy. Qazaqstan turǵyndardyń qajettiligin 19 ónim túriniń 10-y boıynsha tolyq, 6 ónim túrimen 80-98 paıyz jáne taǵy úsh ónim boıynsha 50-den 68 paıyzǵa deıin qamtamasyz etedi. Importqa táýeldilikti barynsha azaıtý úshin aldaǵy ýaqytta óńirlerde iske asyrylatyn iri agrojobalardyń toptamasy jasaqtalady.
Kezdesý sońynda Memleket basshysy áleýmettik mańyzy bar azyq-túlik taýarlarynyń baǵasyn turaqtandyrý jáne aýyl sharýashylyǵyn damytý, qosymsha quny joǵary qazaqstandyq taýarlardy eksportqa belsendi túrde shyǵarý jumystaryn jandandyrýdy tapsyrdy.