Sábı jansaqtaý bólimine tústi.
Ferǵana oblysynda taǵy bir bala tumaýǵa qarsy úndi dárisinen ýlandy, dep habarlaıdy Almaty-akshamy.kz Ózbekstan ulttyq aqparat agenttigine silteme jasap.
2022 jylǵy 28 jeltoqsanda Ferǵana aýrýhanasynyń jansaqtaý bólimine úsh jasar bala tústi. Oǵan «Dok-1 Maks» sıropyn iship ýlandy» degen dıagnoz qoıyldy. Búldirshinniń jaǵdaıy aýyr.
Balanyń aýrýy sýyq tıip, jótelýden bastalǵan. Anasy dárihanadan dárigerdiń nusqaýynsyz «Dok-1 Maks» sıropyn satyp alyp, 4 táýlik boıy kúnine 10 ret 5 ml-den berip otyrǵan.
Buǵan deıin osy dáriden 19 bala kóz jumdy. Qazir bul preparattyń tabletkalary men sıroptary Ózbekstannyń barlyq dárihanasynda satylymnan shyǵaryldy.
Farmasevtıkalyq salany damytý agenttiginiń dırektory qyzmetinen ketti. Al Úndistan bıligi "Dok-1 Maks" preparatyn shyǵaratyn kompanıaǵa qarsy is qozǵady. Qazir tergeý amaldary júrgizilýde.
Munyń aldynda elimizdiń Densaýlyq saqtaý mınıstrligi Ózbekstanda balalardyń ólimine sebep bolǵan preparat Qazaqstanda tirkelmegenin málimdegen bolatyn.