Munda shamamen 1 jarym myńǵa tarta keńes jaýyngeri máńgilik meken tapqan
Soǵys jyldary Tashkent gospıtalderinde qaıtys bolǵan qazaq jaýyngerleriniń beıiti tabyldy. 50-ge tarta maıdangerdiń súıegi Ózbekstan astanasyndaǵy baýyrlastar zıratynda jatyr, dep habarlaıdy Almaty-akshamy.kz «Habar 24» telearnasyna silteme jasap.
Tarıhı derek taıaýda ǵana anyqtaldy.
Baýyrlastar zıratyna ádette musylmandyq nemese hrıstıandyq belgiler qoıylmaıdy. Soǵysta sheıit bolǵandarǵa ortaq bir ǵana eskertkish bar. Ol – jaryn, baýyryn jáne balasyn joqtaǵan ananyń músini. Tashkenttegi baýyrlastar zıraty ótken ǵasyrdyń 70-jyldary ashyldy. Munda shamamen 1 jarym myńǵa tarta keńes jaýyngeri máńgilik meken tapqan.
Tashkent turǵyny Tatána Dýbovık – «Tashpoısk» qoǵamdyq uıymynyń jetekshisi. Baýyrlastar zıratynda jerlengen qazaq jaýyngerleri týraly tarıhı derekti taýyp, jaryqqa shyǵaryp otyr. Bul jerde 1 myń 300-den astam mármer tas bar, árbiriniń astynda qyzyl ásker soldatynyń súıegi jatyr.
«Bir kezderi Orta Azıa boıynsha áskerı okrýg sanalǵan mekemeniń qujattaryn taptyq. Sonyń ishinde sanıtarlyq bólimderdiń arhıvi jáne gospıtálderde emdelgen jaýyngerlerdiń tizimi jazylǵan. Ózbekstan aýmaǵynda naqty 49 qazaq soldatynyń beıiti baryna kózimiz jetti. İzdeý, sáıkestendirý jumystary áli de jalǵasady», - deıdi «Tashpoısk» qoǵamdyq uıymynyń jetekshisi Tatána Dýbovık.
Zırattyń joǵarǵy jaǵynda áskerı ataq pen shen ıeleri, al tómengi tusta sarbazdar jerlengen. Soǵys kezinde bul mańda áskerı gospıtál jumys istedi. Maıdan dalasynan jetkizilgen jaýyngerlerdiń kóbi alǵan aýyr jaraqatynan kóz jumdy. Beıitte temir general Sabyr Rahymovtyń eskertkishi de bar. Polshada qaza tapqan batyrdyń súıegi Tashkentke qaıta jerlengen.
«Adamdardyń aty-jóni durys jazylmaýy da múmkin. Sebebi 70-jyldarǵa deıin qalada 70-ten asa baýyrlastar zıraty boldy. Keıin barlyǵy osynda kóshirildi. Jaýyngerler qaıta jerlendi», - deıdi «Tashpoısk» qoǵamdyq uıymynyń jetekshisi Tatána Dýbovık.
Beıittegi árbir belgi soǵys qurbandary jaıly derekti boıyna búgip jatyr. Tasqa qashalǵan jazýdy ýaqyt óte oqý qıyndap barady. Degenmen zırat ákimshiligi málimetterdi sıfrlyq formatqa kóshirip úlgergen. Jalpy qazaq jaýyngerleriniń tolyqqandy tizimi astanalyq «Atamnyń amanaty» uıymynda bar. Soǵan saı keı qazaqstandyq otbasylar batyr babasynyń súıegin taýyp, urpaq amanatyn oryndady.
«Kezinde jaraqattan qaza tapqan 49 jaýyngerdiń tizimin berdi. Biz ony áleýmettik jelige ornalastyrdyq. Merke aýdanynan Sáýle degen turǵyny bizge habarlasty. Ábdiqadyrov Ázimhan degen kisi qaıyn atasynyń inisi eken. Soǵysqa bir otbasynan 4 aǵaıyn ketken. Qaıyn atasy oralǵan. Úsh inisi habar-osharsyz ketken. Ol kisi Samarqandta jerlenipti», - deıdi «Atamnyń amanaty» qoǵamdyq birlestiginiń quryltaıshysy Álıa Saǵymbaeva.
Otandy qorǵaý jolyndaǵy eren erlik eshqashan umytylmaıdy. Baýyrlastar beıitine kireberiste de osyndaı jazýdy oqydyq. Aýmaq jergilikti ákimdiktiń arnaıy qorǵaýyna alynǵan. Baǵbandar keńes jaýyngerleri jatqan jerge erekshe kútimmen qaraıdy.