Mereke qurmetine 34 úzdik áskerı qyzmetshi men azamattyq personalǵa memlekettik nagradalar tabys etildi
Áskerı bólimder men mekemelerdiń, áskerı oqý oryndarynyń jeke quramy ulttyq merekeni keńinen atap ótýde. 1990 jyly Qazaq KSR Joǵarǵy Keńesi memlekettik egemendik týraly Deklarasıa qabyldanǵan bul kún elimizdiń basty merekesine aınaldy, dep habarlaıdy Almaty-akshamy.kz.
Qorǵanys mınıstrliginde tarıhı kúnniń qurmetine oraı saltanatty jınalys bolyp ótti. Qarýly kúshterdiń jeke quramy men ardagerlerin Qorǵanys mınıstri general-polkovnık Rýslan Jaqsylyqov quttyqtady.
– 1990 jylǵy 25 qazan Qazaqstan halqy úshin ata-baba armany oryndalǵan kún. Bul kún bolashaq urpaqtyń órkendeýin qamtamasyz ete otyryp, derbes ári táýelsiz damý jolyn tańdaǵan betburys retinde tarıhta máńgilikke qalady, – dep atap ótti qorǵanys vedomstvosynyń basshysy.
Mınıstr Qarýly kúshterdiń elimizdiń tynyshtyǵyn saqtaýdaǵy rólin, sondaı-aq ardagerlerdiń armıanyń jaýyngerlik qabiletin qalyptastyrý men nyǵaıtýdaǵy mańyzdylyǵyn erekshe atap ótti.
– Táýelsizdik jyldarynda Qazaqstan armıasy memlekettiń egemendigi men aýmaqtyq tutastyǵyn qamtamasyz etip qana qoımaı, zamanaýı, joǵary jaraqtandyrylǵan jáne utqyr áskerge aınaldy. Bul negizinen Qarýly kúshter ardagerleriniń, sonyń ishinde osy zalda otyrǵan birqatar azamattardyń arqasy, – dedi general-polkovnık Rýslan Jaqsylyqov.
Respýblıka kúnine oraı Prezıdent Jarlyǵymen Qorǵanys mınıstriniń orynbasary Muhamedjan Talasovqa «general-leıtenant» áskerı ataǵy, shtab bastyǵy – Áýe shabýylyna qarsy qorǵanys áskerleri qolbasshysynyń birinshi orynbasary Nurtas Qabaqovqa «general-maıor» áskerı ataǵy berildi.
Mereke qurmetine 34 úzdik áskerı qyzmetshi men azamattyq personalǵa memlekettik nagradalar tabys etildi.
II dárejeli «Dańq» ordenine Bas shtab bastyǵy – Qurlyq áskerleri bas qolbasshysynyń birinshi orynbasary general-maıor Qanysh Ábýbákirov ıe boldy. II dárejeli «Aıbyn» ordenimen Qorǵanys mınıstrligi Tárbıe jáne ıdeologıalyq jumystar departamenti bastyǵynyń orynbasary polkovnık Ermıan Bátov, 78639 áskerı bóliminiń komandıri polkovnık Altynbek Kenjebaev, Injenerlik áskerler departamenti bastyǵynyń orynbasary polkovnık Qanat Mahmetov, 27943 áskerı bólimi komandıriniń orynbasary podpolkovnık Baýyrjan Nazymbekov, 48386 áskerı bóliminiń komandıri podpolkovnık Mergen Nurbaev, Oq-dáriler bas basqarmasynyń bastyǵy polkovnık Andreı Tıhonenko marapattaldy.
«Qurmet» ordenin Qorǵanys mınıstrligi Zań departamenti bastyǵynyń orynbasary ádilet maıory Nurjan Japarov, Qarýly kúshter Áskerı ınfraqurylym bas basqarmasy bastyǵynyń orynbasary zapastaǵy polkovnık Baǵyt Kerimbaev; Áýe qorǵanysy kúshteri ınjenerlik-avıasıalyq qamtamasyz etý bas basqarmasy bastyǵynyń orynbasary polkovnık Arman Úmbetalıev aldy.
Sondaı-aq azamattyq jáne áskerı boryshyn úlgili oryndaǵany úshin Qarýly kúshterdiń birqatar áskerı qyzmetshileri men qyzmetkerleri «Jaýyngerlik erligi úshin», «Erligi úshin», «Eren eńbegi úshin» medaldarymen, Memleket basshysynyń Qurmet gramotalarymen «Qazaqstannyń eńbek sińirgen qaıratkeri» ataǵymen marapattaldy.
Qorǵanys mınıstriniń buıryǵymen qyryqtan astam ofıser men serjantqa kezekti áskerı ataqtar merziminen buryn berildi. Elimizdiń qorǵanys qabileti men áskerı qaýipsizdigin nyǵaıtýǵa eleýli úles qosqan qyryq tórt áskerı qyzmetshige «El qorǵany» vedimistik medali tabystaldy. Budan ózge tórt ofıserge «Zań salasynyń úzdigi» tósbelgisi berildi. Qorǵanys vedomstvosy basshysynyń atynan gramotalar men alǵys hattar tabys etildi.
Marapattaý rásimi Qarýly kúshter Ulttyq áskerı-patrıottyq ortalyǵynyń shyǵarmashylyq ujymy daıyndaǵan merekelik konsertke jalǵasty.