109 laýazymdy qyzmetker jumysynan bosatylǵan
Bıyl elimizdiń kásiporyndarynda myńǵa jýyq adam zardap shekken. Olardyń ishinde 134 adam qaza tapty, dep habarlaıdy Almaty-akshamy.kz.
Jyl basynan beri quqyq qorǵaý oryndaryna osyndaı jazataıym oqıǵalar týraly 744 materıal túsip, 118 qylmystyq is qozǵalǵan. Eńbek qaýipsizdigine beı-jaı qaraǵan 109 laýazymdy qyzmetker jumysynan bosatylǵan. Bul jaıynda Eńbek, áleýmettik qorǵaý komıtetiniń tóraǵasy Tólegen Ospanqulov habarlady.
Onyń aıtýynsha, zardap shekken jumysshylardyń kópshiligi taý-ken metalýrgıa salasynda eńbek etken, dep jazady qazaqstan.tv.
Sonymen qatar qazir jalaqyny ýaqytyly tólemeý jaǵdaılary Qaraǵandy, Shyǵys Qazaqstan, Qostanaı, Aqtóbe, Pavlodar oblystarynda jıilegen.
«Jalaqy boıynsha bereshekti óteýdiń nátıjeligin arttyrý maqsatynda zańnamaǵa ózgerister engizildi. Nátıjesinde jumys berýshiniń jalaqy tóleý týraly nusqamasy atqarýshy qujattyń mindetti kúshine ıe boldy. Osylaısha nusqamanyń oryndalý merzimi aıaqtalǵannan keıin ol jeke sot oryndaýshylarǵa májbúrlep oryndalýy úshin jiberiledi», -deıdi QR EHÁQM Eńbek jáne áleýmettik qorǵaý komıtetiniń tóraǵasy Tólegen Ospanqulov.