Qazaqstandyq boksshy Abylaıhan Júsipov Taılandtyń Chıangmaı qalasynda ótken Azıa chempıonatynyń jeńimpazy dep tanyldy, dep habarlaıdy aqshamnews.kz.
Ulttyq olımpıada komıtetiniń málimetinshe, 71 kelige deıingi salmaq dárejesiniń fınalynda Júsipov Havasbek Asadýllaevqa ese jibergen edi.
Alaıda 11 jeltoqsanda Qazaqstan boks federasıasy IBA jáne ASBC uıymdaryna resmı narazylyq hat joldady. QBF resmı hatynda Abylaıhan Júsipov pen Havasbek Asadýllaev arasyndaǵy jekpe-jekte ózbek boksshysynyń erejelerdi óreskel buzǵany atap kórsetilgen.
Sonymen qatar, sharshy alańda serbıalyq tóreshi Djovanna Ýgrenovıchtiń qatelikke boı aldyrǵany atap ótilgen. Al Qazaqstan tarapy narazylyqty dáleldeý úshin foto jáne beınematerıaldar usyndy.
Nátıjesinde IBA men ASBC jekpe-jekti qaıta qarap, altyn medaldi Júsipovke berý týraly sheshim qabyldady. Asadýllaev belgili bir merzimge jarystardan shettetildi.