Almaty qalasyndaǵy №7 Qalalyq klınıkalyq aýrýhanaǵa 30 jastaǵy er adam bulshyq etteriniń aýyrsynýynan jáne aıaqtaryn jaza almaýynan shaǵymdanyp júgingen. Onyń aıtýynsha, úsh aı buryn fýtbol oıyny kezinde tizesin jaraqattap alǵan, biraq dárigerge qaralmaı, úıde óz betinshe emdelgen. Bul týraly №7 QKA baspasóz qyzmeti habarlady.
«Dop oınap júrip, naýqas júrelep otyryp, aıaqtaryn birden sozbaq bolǵanda býyny blokqa túsip qalǵan. Pasıentke «Medıaldy menısktiń úzilýi, tize býynynyń blokqa túsýi, bulshyq ettiń aýyrsyný sındromy» degen dıagnoz qoıyldy. MRT nátıjeleri menısktiń úzilip ketkenin rastady. Naýqasqa MÁMS qarajaty esebinen tize býynynyń artroskopıasy jasaldy. Bul organdy saqtap qalýǵa baǵyttalǵan ota bolyp, medıaldy menıskke ish jaǵynan 4 tigis salyndy, menısk qaıta tigildi», – dep túsindirdi Ortohırýrgıa bólimshesiniń meńgerýshisi Arnat Baızaqov.
Dárigerler ota sátti ótkenin atap ótti, biraq jaraqat alǵan jaǵdaıda ýaqytyly medısınalyq kómekke júginýdiń mańyzdylyǵyna toqtaldy.
«Qımyl-qozǵalys apparaty zaqymdanǵan kezde dárigerge der kezinde júginbeý aýyr zardaptarǵa ákelýi múmkin. Mundaı jaraqattar naýqasty óz betinshe júrip-turý múmkindiginen aıyrýy yqtımal. Sondyqtan óz betinshe emdelýden, ásirese «Gýgl dárigerge» súıenýden saq bolǵan jón. Ýaqytyly kómek alý – saýyǵýdyń basty sharty», – dedi Arnat Baızaqov.
Dárigerler halyqty qımyl-qozǵalys júıesiniń jaraqattaryna salǵyrt qaramaýǵa jáne kez kelgen jaǵdaıda kásibı medısınalyq kómekke júginýge shaqyrdy. Bul aýyr zardaptardyń aldyn alyp, qalpyna kelý prosesin jeńildetedi.