Almatyda «Ortalyq Azıa – Qytaı» formatyndaǵy syrtqy ister mınıstrleriniń 6-shy kezdesýi ótti.
Oǵan Qazaqstan Syrtqy ister mınıstri Murat Nurtileý, Qytaı Syrtqy ister mınıstri Van I, Qyrǵyzstan Syrtqy ister mınıstri Jeenbek Kýlýbaev, Tájikstan Syrtqy ister mınıstri Sırodjıddın Mýhrıddın, Ózbekstan Syrtqy ister mınıstri Bahtıór Saıdov jáne Túrikmenstan ókili qatysty.
Kezdesýde saıası dıalogty nyǵaıtý, saýda-ekonomıkalyq baılanystardy keńeıtý, ózara kólik baılanysty damytý máseleleri qaraldy. Sondaı-aq, syn-tegeýrinder men qaýip-qaterlermen birlesken kúres, óńirdegi ornyqty damý jáne ekologıalyq qaýipsizdik máselelerine basty nazar aýdaryldy. Ortalyq Azıanyń Qytaımen ózara syılastyq pen teńdik qaǵıdattarynda kópjaqty ózara is-qımylynyń arhıtektýrasyn jaqsartý boıynsha usynystar talqylandy.
Taraptar qazirgi zamanǵy syn-tegeýrinderge úılestirilgen ortaq kózqarastardyń qajettiligin atap ótip, ózara tıimdi damý jolyndaǵy qadamdardy kelisti.
Qazaqstan SİM basshysy óz sózinde óńirdegi turaqtylyqty qamtamasyz etý úshin negizgi salalardaǵy yntymaqtastyqty odan ári keńeıtý qajettigine nazar aýdara otyryp, «Ortalyq Azıa – Qytaı» kópjaqty formatyn nyǵaıtýdyń mańyzdylyǵyn atap ótti.
«Formatymyzdyń «Ortalyq Azıa +» tetikteri arasynda flagmanǵa aınalýy, al kóshbasshylardyń aldaǵy kezdesýi máńgilik dostyq pen órkendeýdiń jańa kezeńin ashýy úshin barlyq jaǵdaı jasalýda» , – dep atap ótti Murat Nurtileý.
Otyrysqa qatysýshylar jahandyq syn-qaterler jaǵdaıynda syndarly dıalogty jalǵastyrýdyń, baılanystardy damytýdyń jáne basym baǵyttar boıynsha kúsh-jigerdi úılestirýdiń mańyzdylyǵyna nazar aýdaryp, osy formattaǵy turaqty kezdesýlerge daıyn ekenin bildirdi.
İs-shara qorytyndysy boıynsha syrtqy ister mınıstrleri Aqparattyq komúnıkeni qabyldady. Onda «Ortalyq Azıa – Qytaı» formaty sheńberinde tatý kórshilik, ornyqty damý jáne kópjaqty ózara is-qımyldy tereńdetý qaǵıdattaryna ortaq mindetteme bekitildi.