Ótken jyly memlekettik satyp alý kezinde 41,4 mlrd teńgege baǵa negizsiz kóterilgen. Bul týraly Sybaılas jemqorlyqqa qarsy is-qımyl agenttiginiń resmı ókili Arman Tileýkenov aıtty, dep habarlaıdy Kazinform.
«2023 jyly memlekettik satyp alý monıtorıńi barysynda 41,4 mlrd teńge somasyna baǵany negizsiz kóterý faktisiniń aldy alyndy. Memlekettik qyzmetshiler kóbinese keńse taýarlaryn, janar-jaǵarmaı materıaldaryn, kompúterlik tehnıka men azyq-túlik ónimderin satyp alý kezinde búdjet kólemin kóbeıtken. Satyp alýǵa bólingen negizsiz somany ákim apparattary, bilim berý jáne densaýlyq saqtaý uıymdary engizgen», - dedi ol vedomstvoda ótken brıfıńte.
Mysaly, onyń dereginshe, 2023 jyldyń naýryz aıynda Qostanaı oblysyna qarasty aýdandyq bilim bólimi lıtri 580 teńge turatyn jazǵy dızel otynynyń 43 myń lıtrin satyp alýdy josparlaǵan. Osy ýaqytta atalǵan otyn lıtriniń quny 250 teńgeden tómen bolǵan. Iaǵnı, eki esege qymbatqa satyp almaǵan. Sybaılas jemqorlyqqa qarsy qyzmettiń aralasýy nátıjesinde 14,8 mıllıon teńge somasynda shyǵynǵa jol berilgen joq.
«Aqtóbe oblysynyń sanıtarlyq-epıdemıologıalyq baqylaý departamenti 15 mıllıon teńgege 3 myń dana bir rettik qorǵanysh medısınalyq kostúm jıyntyǵyn satyp almaq bolǵan. Osyndaı kólemdegi taýardyń naryqtaǵy ortasha quny 6 mıllıon teńgeni quraıdy. 9 mıllıon teńge kóleminde únemdelgen qarjy búdjetke qaıtaryldy. Byltyr maýsym aıynda Abaı oblystyq tabıǵı resýrstar jáne tabıǵat paıdalanýdy retteý basqarmasy uıym basshysyna 2 mln teńgege jıhaz satyp alýdy josparlaǵan. Bul – naryqtyq baǵadan bir jarym ese qymbat. Satyp alý prosesine aralasqannan keıin jıhazdyń baǵasy 700 myń teńgege tómendetilip, 1,3 mıllıon teńgege satyp alyndy», - dedi Arman Tileýkenov.