Ońtústik Koreıanyń parlamenti ıttiń etin jeýge tıym salatyn zań jobasyn maquldady.
208 depýtat qoldap, ekeýi qalys qalǵan zań boıynsha bul elde ıttiń etin jeýge shekteý qoıylady, dep habarlaıdy Almaty-akshamy.kz.
Reuters agenttiginiń habarlaýynsha, Ońtústik Koreıa memleketi ıtti jeý úshin asyraýǵa, soıýǵa tıym salatyn zańdy prezıdent Iýn Sok Óldiń bastamasymen talqylaýǵa usynǵan.
Kópshilik qoldaǵan qujatqa el prezıdenti qol qoısa, zań kúshine enedi.
Zańdy buzǵandar úsh jylǵa sottalady nemese 23 myń AQSH dollary kóleminde aıyppul tóleıdi. It ósirýshiler men meıramhana ıelerine úsh jyl merzim berilip otyr. Olar osy ýaqyt ishinde bıznesin toqtatady ne bolmasa basqa baǵytqa ózgertedi.
Atalǵan elde búginde 100-den asa ıt asyraıtyn ferma bar. Zańǵa fermerler óre túregelip qarsy shyqty, olardyń aıtar ýáji - ıttiń etin jeýge tıym salynsa, mıllıonǵa jýyq adam jumyssyz qalady. Deı turǵanmen de sońǵy jyldary ońtústikkoreıalyqtar ıttiń etin jeýden bas tarta bastaǵan. Áleýmettik saýalnama qorytyndysy da osyǵan saıady, jyldan-jylǵa suranys tómendep keledi.