2024 jylǵy naýryzda Enbek.kz elektrondyq eńbek bırjasynda belsendiliktiń tómendeý úrdisi jalǵasty.
Qol jetimdi bos jumys oryndarynyń sany aqpanmen salystyrǵanda 7% - ǵa tómendep, 75,2 myń birlikke jetti, al túıindeme sany 29% - ǵa azaıyp, 80,8 myń birlikti qurady, dep habarlaıdy Almaty-akshamy.kz sala mınıstrligine silteme jasap.
Aldyńǵy aıdaǵydaı, naýryz aıynda da túıindeme sanynyń aıtarlyqtaı tómendeýi biliktiligi joq jumyskerlermen baılanysty boldy: aqpan aıymen salystyrǵanda osy sanattaǵy usynystar sany 40% - ǵa nemese 15,3 myń túıindemege qysqardy.
Jalpy biliktilik qurylymynda suranys pen usynys arasyndaǵy tepe-teńdik baıqaldy. Osylaısha, barlyq bos jumys oryndarynyń úshten bir bóligi (21 myń) joǵary bilikti kadrlar úshin, 48%-y (36 myń) orta bilikti jáne 24%-y (18,2 myń) biliktiligi joq kadrlar úshin ornalastyrylǵan.
Sonymen birge naýryz aıynda, aqpan aıyndaǵydaı, bos jumys oryndarynyń kópshiligin (80%) zańdy tulǵalar ornalastyrdy.
Bos oryndar sany Qazaqstannyń tórt óńirinde ǵana ósip otyr: Qaraǵandy (+16% nemese 919 bos jumys orny), Abaı (+11% nemese 256 bos jumys orny), Soltústik Qazaqstan (+8% nemese 210 bos jumys orny) jáne Qyzylorda (+6% nemese 133 bos jumys orny) oblystarynda ósim baıqalady.
«Jumyskerlerdi izdeýde eń joǵary belsendilikti Qaraǵandy jáne Túrkistan oblystarynyń jumys berýshileri kórsetti: tıisinshe 6,8 myń jáne 4,7 myń bos jumys orny ornalastyryldy. Sondaı-aq, iri qalalar eńbek naryǵynda suranysty qalyptastyrýǵa belsendi qatysty: Almatyda 6,3 myń, al Astanada 6 myń bos jumys orny jarıalandy. Osylaısha, osy 4 aımaq naýryz aıynda EEB-daǵy bos jumys oryndarynyń jalpy sanynyń úshten birin qurady», – dedi «ERDO» AQ Strategıa jáne úlken derekterdi taldaý departamentiniń dırektory Baqtıar Jazyqpaev.
Eń kóp túıindemeni Túrkistan óńirinen (10 myń túıindeme), sondaı-aq Almaty oblysy men Almaty qalasynan (5,6 myń túıindeme boıynsha) jumys izdeýshiler ornalastyrdy.
Túıindeme men bos jumys oryndaryn óńirlik bólýde teńgerimsizdik saqtalady. Dástúrli túrde artyq jumys kúshi bar ońtústik aımaqtarda bir bos orynǵa eki úmitkerden keledi. Sonymen qatar soltústik aýdandarda bir túıindemege eki bos jumys orny bar.
Naýryzda jumys berýshiler jalaqynyń eń kóp mólsherin obektıvti baqylaý jónindegi ınjenerlerge (orta eseppen 650 myń teńgeden bastap), óndirýshi ónerkásiptegi ýchaskeler bastyqtaryna (628 myń teńgeden bastap), sondaı-aq bas qurylysshylarǵa (627 myń teńgeden bastap) usyndy.
Jumys izdeýshiler arasynda eń joǵary jalaqyny qurylystaǵy óndiris bastyǵynyń orynbasary (orta eseppen 1,1 mln teńgeden bastap), munaı óndirý sheberi (937 myń teńge) jáne komersıalyq kásiporyndar dırektory (819 myń teńge) laýazymdaryna úmitkerler surady.
Osylaısha, naýryz aıynda eńbek naryǵynda belsendiliktiń tómendeýi baıqaldy, ol ásirese, biliktiligi joq jumys izdeýshiler arasynda anyq kórinedi. Sonymen birge orta jáne joǵary bilikti mamandar úshin usynystar basym bola otyryp, bos jumys oryndarynyń biliktilik qurylymy teńgerimdi bolyp qalady.