Bul týraly Qazaqstandaǵy Adam quqyqtary jónindegi ýákil keńsesi málimetinde aıtylǵan.
Atap aıtqanda, qazir ýákil keńsesi turmystaǵy ári otbasyndaǵy zorlyq-zombylyq pen áıelderdiń quqyqtaryn buzý máselelerine taldaý júrgizip jatyr, dep habarlaıdy Almaty-akshamy.kz QazAqparatqa silteme jasap.
«Bul másele búkil álemde óte ózekti. 736 mıllıon áıel túrli zorlyq-zombylyqqa ushyrady. Onyń 640 mıllıonnan astamy (87%) - 15 jastan asqan qyzdar men áıelder. Tek keıingi eki jarym jylda elimizde otbasyndaǵy agresorlar 300 adamnyń ólimine sebepker boldy. Densaýlyqqa aýyr zıan keltirýdiń 913, al densaýlyqqa ortasha zıan keltirýdiń 837 jaǵdaıy tirkeldi. 37 myńnan astam adam túrli jaýapkershilikke tartyldy», - delingen ýákil keńsesi málimetinde.
Sarapshylardyń aıtýynsha, turmystaǵy zorlyq-zombylyqtyń negizgi sebepterine áleýmettik-ekonomıkalyq faktorlar jáne qoǵamdaǵy genderlik stereotıp máselesi áser etip otyr.