Halyqaralyq Jastar kúninde NEET sanatyndaǵy jastarǵa erekshe kóńil bólinetin bolady.
Bul týraly Óńirlik komýnıkasıalar qyzmetiniń brıfıńine Jastar saıasaty basqarmasy men jastar uıymdarynyń ókilderi aıtyp berdi, dep habarlaıdy Almaty-akshamy.kz.
Jastar saıasaty basqarmasy basshysynyń orynbasary Azız Kajdenbektiń aıtýynsha, jyl saıyn 12 tamyzda ótkiziletin jastar kúni merekesine oraı mádenı-buqaralyq is-sharalardan basqa, jastardyń zıatkerlik múmkindikterin, jeke tulǵanyń rýhanı, dene jáne mádenı damýyn damytýǵa baǵyttalǵan is-sharalar ótkizý josparda.
Osyndaı bastamalardyń biri retinde «BazaraNeet» podkasty iske qosylatyn bolady. Joba avtorlarynyń aıtýynsha, olar bilimi ne turaqty jumysy joq jastardy áńgimege tartyp, olardyń máselelerin túsinip, ártúrli taqyryptar boıynsha pikirlerin tyńdaıtyn bolady.
"Ózderińiz biletindeı, podkasttar belgili bir salada jetistikke jetken adamdardyń qatysýymen, olarmen suhbat arqyly júrgiziledi. Bizdiń podkasttyń maqsaty - eńbek adamdarymen, bazarda jumys isteıtin qarapaıym qala turǵyndarymen baılanys ornatý. Olardyń arasynda kóptegen jastar da bar. Biz olardyń qyzmeti týraly kóbirek bilgimiz keledi, sonymen qatar olardyń maqsattaryn, oılaryn tyńdaý bizge mańyzdy. Aıta ketý kerek, qoǵamda bolyp jatqan kóptegen oqıǵalar týraly aqparat árqashan kópshilikke durys jete bermeıdi. Bizdiń oıymyzsha, jas jigitter men qyzdar bazarda tańerteńnen túnge deıin jumys isteı otyryp, árdaıym qajetti aqparat ala bermeıdi. Osy podkastty túsirip, jastarmen kózbe kóz kezdese otyryp, biz olarǵa memleket tarapynan jastarǵa arnalǵan túrli múmkindikter men baǵdarlamalar týraly aıtqymyz keledi", - dedi "Jaidarman" RQB Almaty qalalyq fılıalynyń dırektory Ońdasyn Qulymbetov.
Joba tamyz aıynyń ortasynda bastalady dep josparlanýda. Podkastty Jaidarman oıynshylary júrgizedi. Spıker atap ótkendeı, olarǵa qarapaıym jumysshylar - satýshy, júk tasýshy jáne kúzetshilerdi áńgimege tartý qıyn bolmaıdy.
"Jaıdarman oıyndary áleýmettik lıft ekeni belgili. Jalpy, bizdiń taldaýymyz boıynsha bizdiń negizgi kórermenderimiz - NEET sanatyndaǵy jastar. Jaıdarman oıyndarynda oınaıtyn da, qyzyǵatyn da ózimiz sekildi aýyldyń jastary, jáne olardyń sany jyldan jylǵa artýda. Biz, Jaıdarman oıynshylary úshin osy jastarmen baılanys ornatý mańyzdy. Osylaısha biz ortada baılanystyrýshy kópir bolǵymyz keledi, belgili bir jastar tobyn quryp, olarmen keri baılanys ornatqymyz keledi. Osy baǵytta alǵashqy qadamdardy jasap jatyrmyz, nátıjesin jaqyn arada kóresizder", - dep sóz sońynda atap ótti ol.