Otbasy bank jalǵa beriletin turǵyn úıge sýbsıdıa alý úshin berilgen keıbir qazaqstandyqtar ótiniminiń qabyldanbaý sebebin túsindirdi, dep habarlaıdy Almaty-akshamy.kz QazAqparatqa silteme jasap.
«Biz baǵdarlama bastalǵanda 17 myń qazaqstandyqqa jalǵa beriletin turǵyn úı sýbsıdıasyn alýǵa shaqyrtý habarlamasyn jiberdik. Onyń ishinde 1662 azamattan ótinim kelip tústi. Sonyń ishinde 259 azamattyń ótinishi qanaǵattandyryldy. Iaǵnı olar baǵdarlamaǵa qatysyp, sýbsıdıa ala alady. Bul baǵdarlama úshin sıfrlyq platforma ázirlendi, atalǵan júıe turǵyn úıge muqtaj azamatty avtomatty túrde anyqtaıdy. Oǵan bank qyzmetkerleri áser ete almaıdy. Azamattardyń jeke derekteri memlekettik organdardyń bazasynan tikeleı alynady», - dedi «Otbasy bank» AQ basqarma tóraǵasy Lázzat Ibragımova Ortalyq komýnıkasıalar qyzmeti alańynda ótken baspasóz máslıhatynda.
Onyń aıtýynsha, 105 qazaqstandyq ótinim berip, keıin qaıta bas tartqan. Sonymen qatar tehnıkalyq sebepterge baılanysty 947 ótinim qabyldanbady.
«Dál qazir 128 ótinim tekserýden ótip jatyr. Sol sıaqty sýbsıdıa baǵdarlamasynyń talabyna sáıkes kelmeıtin 61 azamattyń ótinimi keri qaıtaryldy. Keıbir ótinimder qabyldanbaı keri qaıtarylyp jatyr. Onyń sebebi ótinim berýshi uıaly telefonyn kórsetý qajet. Uıaly telefon nómiri memlekettik jeke derekter bazasyndaǵy nómirmen sáıkes kelýi kerek. Iaǵnı eki jaqta eki túrli nómer bolsa ótinim qabyldanbaıdy», - deıdi ol.