Mamandar Mańǵystaýda qoqıqazdardyń ólý sebebi týraly boljamyn aıtty
Mańǵystaý oblysynda ólgen qoqıqazdardyń tabylýyna qatysty oblystyq orman sharýashylyǵy jáne janýarlar dúnıesi aýmaqtyq ınspeksıasy túsinikteme berdi, dep habarlaıdy Almaty-akshamy.kz QazAqparatqa silteme jasap.
«24.04.2022 jyly Facebook áleýmettik jelisinde Beıneý aýdanyna qarasty Sam qumynda Qazaqstannyń Qyzyl kitabyna engen 5 bas qoqıqazdyń (flamıngo) ólgen deneleri qum arasynda jatqany túsirilgen beınejazba taralǵan. Qazirgi tańda osy oqıǵa boıynsha «Sam» memlekettik orman qorynyń ınspektorlary jedel túrde baryp, anyqtaý jumystaryn júrgizýde. Sonymen birge «Ohotzooprom» ÓB» RMQK-nyń Aqtóbe fılıalynyń ınspektorlary, Beıneý aýdandyq PB-niń qyzmetkeri Beıneý aýdanynyń aýmaǵyndaǵy Sam qumy jáne oǵan irgiles jatqan aýmaqtardy sholý jumystaryn júrgizýde», - delingen Mańǵystaý oblystyq orman sharýashylyǵy jáne janýarlar dúnıesi aýmaqtyq ınspeksıasy taratqan habarlamada.
Vedomstvo bul oqıǵaǵa qatysty óz boljamyn da jasaǵan.
«Sońǵy kezderde Mańǵystaý oblysynyń aýmaǵynda daýyl soǵyp, kún jeldi bolyp tur. Jyl qustarynyń mıgrasıasy Beıneý aýdany aýmaǵynan ótedi. Osyndaı qolaısyz aýa raıynda qustardyń mıgrasıasy kezinde ishindegi álsizderi orta jolda qonyp, ári qaraı soltústik baǵytqa usha almaı, olardyń ólimine ákelgen bolýy múmkin. Bul aýmaqta sý kózderi joq. Qustar tabylǵan jaǵdaıda, veterınarlyq dárigerler tarapynan tıisti synamalar alý jumystary júrgiziledi», - dep málimdeıdi tabıǵat qorǵaýshylary.