Premer-mınıstr Oljas Bektenov «Samuryq-Qazyna» ulttyq ál-aýqat qory» AQ dırektorlar keńesiniń otyrysyn ótkizdi, dep habarlaıdy aqshamnews.kz
Jıynnyń basty maqsaty – qor kompanıalary tobynyń negizinde Memleket basshysynyń ekonomıkany yryqtandyrý jónindegi tapsyrmalaryn oryndaý barysyn baqylaý. Qordyń basqarma tóraǵasy Nurlan Jaqypov bıylǵy 11 aıdaǵy óndiristik jáne qarjylyq kórsetkishter boıynsha baıandama jasady.
Qazirgi ýaqytta «Samuryq-Qazyna» AQ kompanıalar tobynyń ınvestısıalyq portfeli jalpy somasy 53,5 trln teńgeni quraıtyn 130-ǵa jýyq jobany qamtıdy.
Úkimettiń erekshe baqylaýyndaǵy 44 ınvestısıalyq iri jobanyń júzege asyrylý barysy qaraldy. Bul jobalarǵa munaı-gaz, munaı hımıasy, energetıka, kólik-logıstıka jáne taý-ken sektorlaryna salynǵan qarjynyń jalpy kólemi 28,8 trln teńge. Qazirgi ýaqytta 23 joba boıynsha ERS-kelisimder jasalyp, 15 jobada qurylys-montajdaý jumystary bastalǵan.
Nurlan Jaqypov «Taldyqorǵan – Úsharal» magıstraldy gaz qubyry jobasy boıynsha 302 shaqyrymdyq gaz qubyrynyń 95,5 shaqyrymy tartylǵanyn jáne jumystardyń merziminen buryn aıaqtalyp jatqanyn atap ótti. Sonymen qatar, «Dostyq – Moıynty» temirjol dálizin jańǵyrtý aıasynda josparlanǵan 836 shaqyrym joldyń 786 shaqyrymy salynǵan.
Prezıdenttiń tapsyrmasyna sáıkes, áleýmettik mańyzǵa ıe jobalardy júzege asyrý úshin jeke kompanıalardyń qarjysyn tartý jumystary jalǵasýda. Osy oraıda, Qyzylorda oblysynda qýaty 1 GVt jel elektr stansıalaryn iske qosý jobasy boıynsha Masdar (BAÁ) kompanıasymen birlesken ınvestısıalyq kelisimge qol qoıyldy.
Shymkent pen Batys Qazaqstan oblystarynda az qamtylǵan otbasylarǵa arnalǵan «Áleýmettik ámıan» pılottyq jobasy iske qosyldy. Bul joba ataýly áleýmettik kómek alatyn azamattarǵa gazben jabdyqtaý tarıfterinde jeńildikter usynýdy kózdeıdi.
Qordyń 11 aılyq esebinde otandyq taýar óndirýshilerdi qoldaý maqsatynda ofteık-kelisimderdiń somasy 182,3 mlrd teńgege jetkeni, bul kórsetkish ótken jylmen salystyrǵanda 12 esege óskeni aıtyldy. Jalpy, otandyq taýar óndirýshilermen 1 trln teńgeden astam somaǵa kelisimshart jasaldy, bul ótken jylmen salystyrǵanda 83%-ǵa joǵary.
2025-2029 jyldary qordyń menshikti qarajatynan 3,6 trln teńge, al jalpy 9,6 trln teńge ınvestısıa salý josparlanǵan.
Otyrys qorytyndysy boıynsha birqatar qujattar qabyldanyp, aldaǵy kezeńge arnalǵan jumys jospary bekitildi. Qor basshylyǵy men qyzmetkerleriniń tıimdiligi otandyq qamtý úlesin arttyrý kórsetkishterimen baǵalanatyn bolady.