Qazaqstan Respýblıkasynyń Prezıdenttigine kandıdat Jıgýlı Daırabaev Semeı qalasyndaǵy «Qazaq Astyq group» JSHS maı ekstraksıalyq zaýytyna baryp, eńbek ujymymen kezdesti. Byltyr iske qosylǵan óndiris oshaǵy maıly daqyldardy óńdeý baǵytyndaǵy iri ári zamanaýı zaýyttardyń biri.
Kásiporyndaǵy kúnbaǵys shıkizatyn óńdeý qýaty táýligine 1000 tonnany quraıdy. Daıyn ónim otandyq naryqtan bólek, TMD elderine eksporttalady. Qazirgi ýaqytta zaýytta 400-ge jýyq adam eńbek etedi.
Kandıdatpen kezdesý barysynda zaýyt ujymy ózderiniń túıtkildi máselelerin baıandap, sheshý joldaryn birlese qarastyrýǵa nıet bildirdi. Zaýyt basshylyǵynyń aıtýynsha búginde tolyqtaı óndiristik qýatqa shyǵý múmkindigi bolmaı otyr. Oǵan sebep kezinde Ýkraına elinen satyp alynǵan jabdyqtarǵa sáıkestik sertıfıkatynyń joqtyǵy.
Óz kezeginde Jıgýlı Daırabaev otandyq óndiris salasynyń damýyna úles qosyp júrgen árbir kásiporynǵa memleket qoldaý kórsetý qajet ekendigine basa nazar aýdardy.
«Elimizdiń ósimdik maıy óndirisinde álemdik deńgeıge kóterilýine kúmán joq. Aýyl sharýashylyǵy óndirýshilerine úlken kólemdegi eksportqa shyǵýǵa múmkindik bar. Óz kezeginde memlekettiń saıasaty egistik alqabyn ártaraptandyrýǵa jáne maı daqyldaryn ósirýdi sýbsıdıalaýǵa baǵyttalýy tıis. Osylaısha osy sektordaǵy ımporttyń úlesin azaıtýǵa jáne jeke qaıta óńdeýshi óndiris oshaqtaryn damytýǵa septigimiz tıedi», – deıdi Jıgýlı Daırabaev.
Jıyn sońynda kandıdat óziniń saılaýaldy baǵdarlamasynyń negizgi baǵyttaryna toqtalyp, salany damytý jolyndaǵy josparlarymen bólisti. Al, zaýyt ujymy Jıgýlı Daırabaevtyń bastamalaryn qoldap, iske asyrýǵa járdemdesýge daıyn ekendikterin jetkizdi.