Eldegi salalyq kásipodaq ókilderi Meıram Qajykenge kaska jiberýde.
Osylaısha olar kandıdatqa óz qoldaýlaryn bildirip jatyr.
«Kásipodaq músheleri eńbek adamynyń sımvoly bolǵan kaskalardy jiberip jatyr. Bizge poshta arqyly Qyzylorda, Taldyqorǵan, Petropavl jáne Qaraǵandydan joldanǵany týraly aqparat kelip tústi. Biz olardyń barlyǵyn jınaımyz. Jumysshylar kaskaǵa ózderiniń izgi tilekterin jazyp, qoltańbalaryn qaldyrady», - dedi saılaýaldy shtabynyń basshysy Ábil Kekilbaev.
Sondaı-aq, senim kaskasyn Almaty, Mańǵystaý oblysy, Pavlodar, Arqalyq jáne Kókshetaý kásiporyndarynyń jumysshylary da jiberýde. Olar bul boıynsha arnaıy áleýmettik jelilerge beınerolıkter júktegen.
Meıram Qajykenge kaska tapsyrý trendke aınaldy. Esterińizge sala keteıik, 21 qazanda saılaýaldy shtab ashylyp, úgit-nasıhat bastalǵan kúni kásipodaq ókilderi Meıram Qajykenge alǵashqy kaskany tabystaǵan bolatyn.
Sondaı-aq, óńirlerdegi úgit-nasıhat kezinde kandıdat Óskemen GES qyzmetkerlerinen, Sokolov-Sarybaı taý-ken baıytý óndiristik birlestiginiń kenshilerinen jáne «Jezqazǵansvetmet» kenshilerinen de senim kaskasyn aldy.
Sonymen qatar, A. Kekilbaevtyń aıtýynsha, óńirlerdegi shtabtardyń jumystary qyzý jalǵasýda: qazirgi tańda senimdi tulǵalar kásiporyndarǵa, aýrýhanalarǵa, mektepterge jáne basqa da uıymdarǵa baryp, kandıdattyń baǵdarlamasyn tanystyrý maqsatynda kezdesýler ótkizip jatyr.
«Qazaqstan boıynsha 140-tan astam senimdi tulǵa bar. Qazir saılaýǵa baıqaýshy retinde qatysatyn eriktilerdi irikteý jumystary júrgizilýde», - dedi elordalyq shtab basshysy.