Almatyda «Masha men Dýdaraı» fılminiń kórermenderi arasynda uıymdastyrylǵan «Kınoteatrdan - Las-Vegasqa!» atty utys oıyny óz máresine jetti.
Oıyn sharty óte jeńil boldy. Oǵan Kinopark jáne Kinoplex jelilerinen «Masha men Dýdaraı» fılmin kórip, kýpon toltyrǵandar qatysty, dep habarlaıdy Almaty-akshamy.kz "Habar" arnasynyń resmı saıtyna silteme jasap.
Tiger Films prodúserlik kompanıasy túsirgen «Masha men Dýdaraı» romantıkalyq hıkaıasy 10 aqpanda prokatqa shyqty. Sol kúni bastalǵan aksıa 10 naýryzǵa deıin jalǵasty. Utys oıynyn ótkizýge IBC group kompanıasy qoldaý kórsetken.
İs-shara áleýmettik jelide tikeleı efırde kórsetildi. Álemdik shoý-bıznestiń ortalyǵy Las-Vegasqa joldama Saryaǵash qalasynyń turǵynyna buıyrdy.
Kórermenniń yqylasyna bólengen «Masha men Dýdaraı» qazir kórshi elderde kórsetilip jatyr.
«Bul - tarıhta bolǵan oqıǵa. Orys qyzy qazaq jigitke ǵashyq bolǵan. Erekshe mahabbat hıkaıasy. Osyny biz jańa leppen, zamanaýı turǵyda túsirdik», - deıdi akter Táýekel Músilim.
«Bul - meniń alǵashqy úlken rólim. Fılm qazir Qyrǵyzstanda kórsetilip jatyr. Al 28 sáýirden bastap Ázirbaıjanda kórsetile bastaıdy», - deıdi aktrısa Marıa Petlúh.
Romantıkalyq janrdaǵy fılmdi Qytaı kınoteatrlarynda kórsetý josparda bar. Sondaı-aq prodúserelik ortalyq jaqynda Germanıa kınoteatrlarymen de kelissózdi bastamaqshy.