Samarqandta mereıtoılyq XV Tashkent halyqaralyq «Jibek jolynyń injý-marjany» kınofestıvali aıaqtaldy.
Ulttyq kınony qoldaý memlekettik ortalyǵynyń kómegimen túsirilgen Darhan Tólegenovtyń «Aǵaıyndy» jáne Ádilhan Erjanovtyń «Ademokany oqytý» fılmderi «Úzdik rejıser» jáne «Qazylar alqasynyń arnaıy júldesi» nomınasıalarynda júldeli oryndarǵa ıe boldy, dep habarlaıdy Almaty-akshamy.kz.
Festıválde «Aǵaıyndy» fılminiń atynan qatysqan prodúser Maksım Akbarov «Dala» atty óziniń rejıserlik fılmi úshin «Úzdik debút» nomınasıasynda jeńiske jetti. Jeńimpazǵa syılyqty ataqty amerıkalyq akter, «Oskar» syılyǵynyń eki dúrkin ıegeri Kevın Speısıdiń ózi tabys etti.
Al festıváldiń bas júldesi «Úzdik fılm» nomınasıasynda ózbekstandyq rejıser Shokır Holıkovtyń «Jeksenbi» fılmine buıyrdy.
XV Tashkent halyqaralyq kınofestıvali 29 qyrkúıek pen 2 qazan aralyǵynda ótti. Oǵan 52 elden 300-den astam kınogerler qatysty. Kınofestıval aıasynda kórermender 60 kórkem, derekti jáne qysqametrajdy fılmderdi tamashalaı aldy.
Festıvál qonaqtary arasynda joǵaryda atalǵan Kevın Speısıden basqa fransýz kınosynyń juldyzdary – «Taksı» fılminiń akterleri Frederık Dıfental men Samı Naserı, ataqty polák rejıseri Kshıshtof Zanýssı, serb rejıseri Emır Kýstýrısa jáne taǵy basqalar boldy.