Almaty qalasynyń Naýryzbaı aýdanynda «Halyq qatysatyn búdjet» baǵdarlamasy aıasynda iske asyrylǵan nysandar boıynsha baspasóz týry ótti.
Aýdan ákimi joba avtorlarymen birge turǵyndarǵa qaıta qurý nátıjelerin kórsetti, dep habarlaıdy aqshamnews.kz.
Birinshi nysan «Barlyq» bazarynyń aldyndaǵy aýmaqty abattandyrý boldy. Buryn ýchaske qaraýsyz qalǵan, qazir uzyndyǵy 450 metr bolatyn zamanaýı qoǵamdyq aımaqqa aınaldy. Abattandyrylǵan aýmaqta stıhıalyq saýdany boldyrmaıtyn qorshaýlar ornatyldy, avtomatty sýarý júıesi bar 150 aǵash pen 60 buta otyrǵyzyldy, sondaı-aq elektr berý jelileri turǵyndarynyń qaýipsizdigi úshin jer astyna kóshirildi.
«Qazir bul jer tolyǵymen ózgerdi. Joldar, jasyl jelekter, yńǵaıly aımaqtar-bári turǵyndar úshin jasalyp jatqanyn kórýge bolady. Osy jobaǵa qatysqandardyń barlyǵyna rahmet», - dedi aýdan turǵyny Beıbit Nazarov.
Baspasóz týry aıasyndaǵy kelesi nysan Shuǵyla shaǵyn aýdanyndaǵy jaıaý júrginshiler aımaǵy boldy. Uzyndyǵy 350 metr bolatyn jańa jaıaý júrginshiler aımaǵy turǵyndar úshin súıikti orynǵa aınaldy. Munda balalarǵa arnalǵan zamanaýı oıyn alańy, basketbol alańy jáne vorkaýt aımaq, mádenı is-sharalarǵa arnalǵan amfıteatr. Sondaı-aq, 84 qaıyń, 24 qaraǵaı, 500-den astam buta otyrǵyzyldy, 3 400 m2 kógal jasaldy.
Úshinshi nysan «Edelveıs» baq-baqsha qaýymdastyǵy joldy abattandyrý boldy, onda jol jabyny men trotýarlar jaqsartyldy, bul qozǵalys jaılylyǵyn qamtamasyz etti. Budan basqa, 3 800 m2 trotýar salyndy, 14 500 m2 jol jabyny jańartyldy jáne «Ál-Farabı» TK jáne basqa da turǵyn aýdandarda jańa asfált tóseldi.
«Jańa asfált, jaryqtandyrý-munyń bári bizdiń ómirimizdi jaqsartady. Biz bul ózgeristerge rızamyz!»,- dep atap ótti», - Edelveıs» BQ turǵyny Irına Vaganova.
Sońǵy nysan – Rahat shaǵyn aýdanyndaǵy aýlalardy abattandyrý. Abattandyrý aıasynda Rahat sh/a segiz kóppáterli úıdiń qasbetteri jańartyldy, aýlalar zamanaýı kelbetke ıe boldy, jańa qoqys jáshikteri ornatyldy, fýtbol alańy jańartyldy jáne jańa asfált tóseldi.
«Qazir bizde jańartylǵan fýtbol alańy jáne jaıly aýla bar. Bul biz kópten kútken nárse!», - dedi shaǵyn aýdan turǵyny Rınat.
Óz kezeginde Naýryzbaı aýdanynyń ákimi Nazıra Toǵyzbaeva HQB baǵdarlamasynyń mańyzdylyǵyn atap ótti.
«Biz árbir bastamany baǵalaımyz jáne ony eń jaqsy jolmen júzege asyrýǵa tyrysamyz. HQB - bul árbir turǵyn úshin aýdannyń damýyna óz úlesin qosý múmkindigi», - dep bólisti óz oıymen aýdan ákimi Nazıra Toǵyzbaeva.
Naýryzbaı aýdany turǵyndardyń bastamalary men «Halyq qatysatyn búdjet» baǵdarlamasyn qoldaý arqasynda jaıly ári zamanaýı túrge endi, jaqsy jaqqa ózgerý jalǵasatyn bolady.