Ol velosıpedpen 5 myń shaqyrym júrip ótken.
Áýesqoı veloshabandoz saıahatty Mysyr jerinen bastap, Saýd Arabıasy men Qatarǵa soǵyp, Birikken Arab Ámirlikterine jetken. Bul – Damırdiń alǵashqy saıahaty emes. Buǵan deıin ol Qazaqstandy jaıaý, Ońtústik Koreıa men Túrkıany velosıpedpen birneshe ret aralaǵan, dep habarlaıdy Almaty-akshamy.kz 24.kz-ke silteme jasap.
Uzaq joldy eńserip Abý-Dabıge jetken velosaıahatshyny elimizdiń Birikken Arab ámirlikterindegi elshisi Madıar Meńilbekov erekshe yqylas bildire kútip aldy. Bul – saıahat jáı ǵana eldi aralap, saıahat qurý emes, maqsaty, naqty mısıasy bar jolsapar. Sondyqtan elshi myrza Ámirliktegi áriptesterine otandasymyzdyń jasaǵan joryqtaryn tanystyryp, qoldaý bildirdi. 27 aqpan kúni Sharm-esh-sheıhtan bastalǵan jol Egıpettiń astanasy Kaırge jetkizdi. Odan soń Aleksandrıa men Port Saıd qalalaryna barǵan. Egıpet saparynda dittegeni – Sultan Beıbarystyń 800 jyldyǵyna oraı Mysyrdy bılegen qazaqtyń dańqyn kóterý, esimin ulyqtaý.
«Egıpet eli Sultan Beıbarysty qurmetteıdi. Elden shyǵarda onyń atyndaǵy meshitke barýdy maqsat ettik. Odan keıin Kaırde uly Abaıǵa ornatylǵan eskertkishti óz kózimizben kórgimiz keldi. Almatydan Sharm El sheıhke ushyp jettik. Odan ári Kaırǵa velosıpedpen jetip aldyq. Tarıhshylarymen sóılestik. Olar Sultan Beıbarystyń Mysyr eline qazaqtyń kıiz úıin tikkenin, osylaısha, ózi týǵan dalanyń qundylyqtaryn ustanym ete otyryp, Mysyr jerin de kótere bilgen tulǵa retinde tanyp otyr», - deıdi velosaıahatshy Damır Kósheev.
Damır Kósheev bul jolǵy velosapardy dosy Oralhan Tynbaevpen birge bastapty. 2 otandasymyz Egıpetti asyp keıin naýryz aıynda Saýd Arabıasyna barǵan. Bul joly velosapardaǵy marshrýt – Er-Rıad-Medına-Djıdda-Mekka jáne taǵy da Er rıad qalasy. Qasıetti Mekke qalasyndaǵy Al-Haram meshitin aralaǵan. Odan ári jolǵa Damır Kósheev ózi ǵana attandy. Katar memleketine baryp, Doha qalasyna aýmaǵyn júrip ótken. Araǵa kúnder salyp, eki dóńgelekti temir tulparymen Arab Ámirlikterine jetti. Taıaý Shyǵysqa jasaǵan alǵashqy velojoryqqa saıahatshy kúnniń qatty ystyq bolýy áser etkenin aıtady, biraq kedergi emes. Onyń jospary boıynsha kelesi lokasıa – Dýbaı qalasy.
«Qazaqstanda uzaq qashyqtyq bolǵanymen, tabıǵat áldeqaıda jumsaq. Sosyn bizde aýyldar bar, jolaıt az kem demalyp, saıa tabýǵa bolady. Munda trassa boıynda ornalasqan aýyldar joq. Biraq jol, ınfraqurylym jaǵdaıy óte jaqsy jáne halqy – tym qonaqjaı, meıirimdi adamdar. Jolaýshy ekenimdi kórip, aıaldap amandasyp, as berip, sý ákep berip jatty. Joǵary adamı qasıetteri men qundylyqtary arqyly kóterip jiberdi, tipti joldyń qıyndyǵyn umytyp kettim. Arab álemi kórkem, soǵan kóz jetkizdim», - deıdi velosaıahatshy Damır Kósheev.
Jolaýshymen tanysyp, mán-jáı biliskende Damır Kósheev óz otanyn maqtanyshpen tanystyratynyn bizge ol erekshe kúımen áńgimelep berdi, Otanǵa degen qurmeti. Onyń armany naǵyz saıahatshyniki – jer sharyn aınalyp, álem kórý.