«KIOF» halyqaralyq ańshylyq, balyq aýlaý jáne belsendi demalys kórmesi 27–30 sáýir aralyǵynda «Atakent» kórme ortalyǵynda, №9 pavılonda ótip jatyr, dep habarlaıdy Almaty-akshamy.kz.
İs-sharany Almaty qalasy ákimdiginiń qoldaýymen «Qansonar» ańshylardyń qoǵamdyq birlestikteri men ańshylyq sharýashylyǵy sýbektileriniń respýblıkalyq qaýymdastyǵy, Orman sharýashylyǵy jáne janýarlar dúnıesi komıteti, «Kerýenshiler» qaýymdastyǵy jáne «Central Asia Trade Exhibition» JSHS-sy uıymdastyrdy
«Ańshylyq, balyq aýlaý jáne belsendi demalys kórmesi Qazaqstanda 4-ret ótip jatyr. Bıyl 50-den astam kompanıa ań aýlaý, balyq aýlaý jáne ashyq aýada demalýdyń jańa maýsymyna óz taýarlaryn usynýda. Kórmede tek otandyq kompanıalar emes, Reseı jáne Qytaı ókilderi de bar. Buryn tek ańshylyq jáne balyq aýlaý kórmesi bolsa, osy jyl belsendi demalysqa baılanysty ónimderdi qostyq. Bul sala elimizde damyp kele jatyr. Kórmege barlyq nıet bildirgen azamattar tirkeýden ótip, qatysa alady», – dedi shara uıymdastyrýshysy Baýyrjan Ospanov.
Aıta ketken jón, kórmeniń ár kúni pavılon aýmaǵynda balyq aýlaý ilmegin baılaý, joryq sómkesin daıyndaý, jabaıy úırekterdiń túrin anyqtaý sekildi qyzyqty oıyn-saýyq sharalary ótkizildi.
– Kórmeniń bas uıymdastyrýshysy – «Qansonar» ańshylardyń qoǵamdyq birlestigi. Onyń qurylǵanyna 10 jyl boldy. Biz ańshylardy oqytyp, olarǵa kýálik beremiz. Ańshylardyń sýbektileri bar, biz solardy tirkep, jyl saıyn kvota beremiz. Zoologıa ınstıtýtynyń zertteýine súıene otyryp, qansha ań aýlaýǵa bolatynyn habarlaımyz. Qoǵamdyq birlestigimiz Ekologıa jáne tabıǵı resýrstar mınıstrligimen tyǵyz baılanysta jumys isteıdi», – dedi «Qansonar» QB bas dırektory Murat Qabylbekov.
