Bilim saıysyndaǵy jetistikteri úshin oqýshylarǵa beriletin syıaqy mólsheri qandaı?
Bıyl Qazaqstan oqýshylary halyqaralyq pándik olımpıadada 2 altyn, 13 kúmis jáne 11 qola medal jeńip aldy. Bul jaıynda QR Bilim jáne ǵylym mınıstri Asqat Aımaǵambetov málim etti, dep habarlaıdy Almaty-akshamy.kz QazAqparatqa silteme jasap.
«2021 jyl qazaqstandyq oqýshylar úshin oljaly boldy. Bıyl shákirtter álemdik olımpıadalarda 31 medaldiń 26-yn jeńip alyp, sońǵy jyldardaǵy rekordty jańartty. Bilim alýshylar el qorjynyna 2 altyn, 13 kúmis jáne 11 qola medal saldy. Bıylǵy Qazaqstan halqyna Joldaýynda Memleket basshysy Qasym-Jomart Kemeluly Toqaev daryndy balalardy qoldaý úshin sharalar ázirleýdi tapsyrdy. Bul mindetti iske asyrý úshin mınıstrlik zańnamaǵa túzetýler ázirledi. Qazir zań jobasy QR Parlamenti Májilisiniń qaraýyna engizildi», - dep jazdy mınıstr Facebook paraqshasynda.
Onyń atap ótýinshe, túzetýler halyqaralyq pán olımpıadalarynyń júldegerlerine joǵary oqý oryndaryna UBT-siz, ıaǵnı konkýrstan tys negizde bilim alý úshin granttar berýdi, sondaı-aq osy olımpıadalardyń jeńimpazdary men júldegerleri jáne olardy daıarlaǵan pedagog- jattyqtyrýshylarǵa da birjolǵy aqshalaı syıaqy tóleýdi kózdeıdi.
«Oqýshylardy yntalandyrý úshin altyn medal ıegerlerine — 1500 AEK, kúmis medal úshin – 1000 AEK, qola medalǵa – 500 AEK kóleminde aqshalaı syıaqy taǵaıyndaý josparlanyp otyr», - dedi Asqat Aımaǵambetov.