Bul byltyrǵy jyldyń osy kezeńimen salystyrǵanda 20 prosentke kóp
Jaqynda ǵana «Almaty-Qorǵas» tas jolynda eń iri jol apaty boldy. 17 avtomobıl bir-birine soǵylǵan edi. Osyǵan baılanysty oblystyq PD qylmystyq is qozǵady. Kólikterdiń soqtyǵysýy «Almaty-Óskemen» avtomagıstralinda da jıilep ketti.
Taldyqorǵannan Úsharalǵa deıingi aralyqta osyndaı onnan asa qaýipti aımaq bar. Júrgizýshilerdiń keıbiri asfált tóselgen jol aıaqtalyp, aınalmaǵa burylatyn jerdi baıqamaı tike ótip ketetin kórinedi.
«Aıyna bir-eki ret jol kólik oqıǵasy bolady. Osy jerge shaqyrtýmen kelemiz. Bári osy jyldamdyqty saqtamaǵandyqtan bolady. Jol belgileri tur», - deıdi patrúldik polısıa ınspektory Baqtıar Otarshynov.
Mundaǵy jol belgileri ýaqytsha qoıylǵan. Óıtkeni avtomagıstral 2018 jyldan beri qaıta salynyp jatyr. Qazir 300 shaqyrymnan asatyn joldyń 280 km paıdalanýǵa berilgen. Sáıkesinshe, kólikter de júıitkip júretin boldy.
Jol sapasy jaqsarǵanymen onyń qysqy kútimine baılanysty júk kóligi júrgizýshileriniń aıtar ýáji bar.
Kólik júrgizýshileriniń aıtýynsha, joldyń jıegine kólikpen shyǵyp toqtaı almaıtyn kórinedi. Jol kútimine jaýaptylardyń jumysyn nashar dep baǵalap otyr. Óıtkeni jańbyr jaýsa birden muz qatyp, júrý qıyndaıdy.
Taldyqorǵan men Úsharal aralyǵyndaǵy jol kútimine qatysty polıseıler birneshe ret tekseris júrgizgen. Nátıjesinde jaýapty mekemelerge 50-den asa uıǵarym berildi. Oblys aýmaǵyndaǵy ózge joldarda da olqylyqtar anyqtalǵan.
«Joldy tehnıkalyq baqylaý bóliminiń qyzmetkerleri Almaty oblysynda 2500 tekserý jasalyp, uıǵarymdar berilgen. Sol uıǵarymdardy oryndamaǵany úshin 250 jol mekemesiniń nemese aýyldyq, aýdandyq ákimshilik jazaǵa tartyldy. Sonyń ishinde «Qazavtojol» kompanıasy bar», - dedi Almaty oblystyq PD ÁPB bólim basshysy Serijan Ábjanov.
Bıyl oblys joldarynda 2044 kólik soqtyǵysyp, 2900-den asa adam jaraqat aldy. 400-den asa jolaýshy qaıtys boldy. Qara joldaǵy qaıǵyly jaǵdaıdy azaıtý maqsatynda kelesi jyly óńirdegi avtomagıstraldarǵa 300-den astam beınebaqylaý kameralary ornatylady.