Sertıfıkat alǵannan keıin turaqty jumysqa ornalasady.
Jumyspen qamtý jáne kásipkerlikti damytýǵa baǵyttalǵan «Eńbek» memlekettik baǵdarlamasy aıasynda jarty jylda 603 almatylyq oqý kýrstarynan ótken. Jospar boıynsha bıyl 1000 adamdy oqytý kerek, dep habarlaıdy Almaty-akshamy.kz Almaty.tv saıtyna silteme jasap.
Kýrstyń uzaqtyǵy úsh aı. Osy ýaqytta óndiristik tájirıbeden ótip, ózderin jaqsy qyrynan kórsetýge de múmkindik alǵan. Sondaı-aq, balalary bar analar úshin arnaıy jaǵdaı jasalǵan. Ortalyqta olarǵa aǵylshin tili, matematıka, shahmat synyptary uıymdastyrylady.
«Bizde oqytý kýrstarynan ótkenderdiń barlyǵy jumysqa ornalasady dep senimdi túrde aıta alamyn. Óıtkeni olardy myqty túrik aspazy oqytyp jatyr. Qazirdiń ózinde beldi meıramhanalardyń aspazshylary olarǵa qyzyǵýshylyq tanytyp, jumysqa alýǵa daıyn otyr», – dedi oqý ortalyǵynyń basshysy Bıbinur Sheralıeva.
«Eńbek» baǵdarlamasyna qatysqysy keletinder jumyspen qamtý ortalyǵyna baryp, «jumyssyz» statýsyn ıelenip, nıetin bildirse, jetkilikti. Búginde 41 mamandyq boıynsha oqytý kýrstary bar, uzaqtyǵy 1 aıdan 3 aıǵa deıin. Qatysýshylarǵa 20 myń 949 teńge kóleminde shákirtaqy tólenedi. Kýrs aıaqtalǵan soń kásibı biliktilikti arttyrý týraly sertıfıkat beriledi.
«Sertıfıkat alǵannan keıin turaqty jumysqa ornalasady nemese óziniń bıznes josparyn qorǵap, 200 aılyq eseptik kórsetkish kóleminde grant utyp alýǵa múmkindigi bar. Biz ár adamdy jeke baqylap otyramyz. Sondaı-aq, oqytý ortalyqtarynyń jumysynyń durys uıymdastyrylýyn da baqylap otyramyz», – dedi Jumyspen qamtý ortalyǵy ýaqytsha jumys oryndary bóliminiń basshysy Gaýhar Áýelova.