Jumys oryndarynda vırýstyń taralýyn toqtatý jáne jumyskerlerdiń qorǵalýyn qamtamasyz etý qajet.
Kásipodaqtar federasıasy kásipodaq uıymdaryna, jumyskerlerge jáne jumys berýshilerge koronavırýs ınfeksıasyna qarsy vaksınasıa máselesi boıynsha úndeý joldady, dep habarlaıdy Almaty-akshamy.kz.
Kásipodaqtar federasıasynyń úndeýinde kúlli álemde, sonyń ishinde bizdiń elimizde de koronavırýs ınfeksıasynyń kesirinen daǵdarys bolǵany aıtylǵan. Sonymen qatar qujatta pandemıa eńbek naryǵyna keri yqpal etip, tolyq emes jumyspen qamtýdyń artýyna jáne ekonomıkalyq belsendiliktiń tómendeýine, kásiporyndardyń jabylýyna, eńbek tabysynyń azaıýyna, eńbek qaýipsizdigi jáne eńbek quqyqtary salasynda jańa syn-tegeýrinderge alyp kelgeni týraly aıtylǵan.
«Osy jaǵdaıda kásipodaqtar men jumys berýshilerdiń aldynda turǵan mańyzdy mindet – óndiristik áleýetti saqtap qalý. Jumys oryndarynda vırýstyń taralýyn toqtatý jáne jumyskerlerdiń qorǵalýyn qamtamasyz etý qajet. Bul máselede el turǵyndaryn vaksınasıalaý mańyzdy qural bolyp tabylady. Vaksınasıa – bul pandemıany toqtatýdyń, qaýipsiz eńbek jaǵdaılaryn qamtamasyz etýdiń, jumysshylar men olardyń otbasylarynyń densaýlyǵyn qorǵaýdyń jalǵyz joly», – delingen úndeýde.
Elde vaksınasıa alǵysy keletinderdiń barlyǵyna aqysyz vaksınasıa alýǵa jáne aýyr indettiń taralýyna jol bermeýge jaǵdaı jasalǵan.
«Biz jumyskerlerdi óz densaýlyǵy men jaqyndarynyń densaýlyǵyna qamqorlyq tanytyp, qaýipsiz jaǵdaıda jumys isteý úshin COVID-19 qarsy vaksına alýǵa shaqyramyz»,– dep jazylǵan qujatta.