Memlekettiń bas sanıtar dárigeri ashyq aýada namaz oqýǵa ruqsat bergen.
Osy aptadan bastap Qazaqstanda juma namaz meshitter aýlasynda oqylady. Sanıtarlyq talaptar boıynsha, namaz ashyq aýada, áleýmettik qashyqtyq saqtalyp, oqylýy tıis, dep habarlaıdy Almaty-akshamy.kz.
«Bas memlekettik sanıtarıalyq dárigerdiń «Qazaqstan Respýblıkasynyń halqy arasynda koronavırýstyq ınfeksıa aýrýynyń aldyn alý jónindegi sharalardy odan ári kúsheıtý týraly» 2021 jylǵy 2 qyrkúıektegi №38 Qaýlysyna sáıkes osy aptada elimizdiń barlyq meshitteri aýlasynda juma namazyn oqýǵa ruqsat berildi», – delingen QMDB-nyń resmı saıtynda.
QMDB-ǵa qarasty 19 ókildiktiń beseýinde ǵana juma namazyn oqý ýaqytsha toqtatylǵan bolatyn. Jańa qaýlyǵa sáıkes endi elimizdiń barlyq óńirinde juma namazy meshit aýlasynda oqylady.
Bas memlekettik sanıtarıalyq dárigerdiń qaýlysynda bul jaıly: «Meshitter, pravoslavıe shirkeýleri jáne basqa da dinı obektiler aýmaǵynda ujymdyq dinı is-sharalardy (onyń ishinde «juma namazy», kúndelikti pravoslavıelik duǵalar jáne basqalaryn) ashyq aýada ótkizý maska rejımi men bir adamǵa keminde 4 metr esebinen áleýmettik qashyqtyq saqtalǵan kezde júzege asyrylady» delingen.
Qaýlyda shekteý is-sharalaryn, onyń ishinde karantındi engizý kezeńinde dinı obektilerdegi sanıtarıalyq-dezınfeksıalyq rejımge qoıylatyn talaptar da kórsetilgen. Atap aıtqanda, meshitterde bir ret qoldanylatyn medısınalyq maskalardyń jetkilikti qorymen, sondaı-aq qoldy óńdeýge arnalǵan dezınfeksıalyq sýlyqtarmen, teri antıseptıkterimen, dezınfeksıalaý quraldarymen qamtamasyz etýdi uıymdastyrý, dinı obektilerde personal men dinı qyzmetshilerdiń maskalar kıýin qamtamasyz etý mindettelgen.
Sondaı-aq ǵıbadat úılerine (qurylystaryna) kirýge mindetti túrde maska bolǵan jaǵdaıda ruqsat etiledi. Ǵıbadat úılerinde namaz oqý bir adamǵa 4 metrden kem emes eseppen qashyqtyqty saqtaý kezinde júzege asyrylady.