Qasym-Jomart Toqaevqa 6 mln 456 myń 392 saılaýshy nemese olardyń 81,31%-y daýys bergen.
Qazaqstannyń Ortalyq saılaý komısıasy Prezıdent saılaýynyń aldyn ala nátıjesin jarıalady, dep habarlaıdy Almaty-akshamy.kz.
Ortalyq saılaý komısıasynyń tóraǵasy Nurlan Ábdirovtiń aıtýynsha, qazirgi ýaqytta el óńirleri men shet elderdegi saılaý ýchaskelerinde daýystardy sanaý aıaqtaldy. Keshe kúni boıy onlaın rejımde óńirlerdiń jedel derekteri negizinde OSK qazaqstandyqtardyń daýys berýge qatysýynyń belgili bir ýaqyttaǵy jaǵdaıyn habarlap otyrdy. 9 brıfıń ótip, aqparat shuǵyl berilip otyrdy.
Osylaısha OSK tóraǵasynyń aıtýynsha, Q.Toqaevqa 6 mln 456 myń 392 saılaýshy nemese olardyń 81,31%-y daýys bergen. «Bárine qarsymyn» baǵanyn 460 484 nemese 5,8% saılaýshy tańdaǵan.
Sonymen birge, Jıgýlı Daırabaevqa 271 641 nemese 3,42 paıyz, Qaraqat Ábdenge 206 myń nemese 2,6 paıyz, Meıram Qajykenge 200 907 nemese 2,53 paıyz, Nurlan Áýesbaevqa 176 116 nemese 2,22 paıyz jáne Saltanat Tursynbekovaǵa 168 731 nemese 2,12 paıyz daýys berilgen.
Ázirge aýmaqtyq saılaý komısıalary daýys berý nátıjeleri týraly hattamalardyń elektrondy kóshirmelerin usyndy.
«Sonymen, naqtylanǵan saılaýshylar tizimderine saı, jalpy saılaýshylar sany 11 mln 953 myń 465 adamdy qurady. Onyń 8 mln 300 myń 46 adamy nemese 69,44 paıyzy daýys berýge arnalǵan búlletenderdi aldy. Daýys berý kúni QR Prezıdenttigine kandıdattardyń 11 myńnan asa senim bildirgen adamdary, sheteldik halyqaralyq uıymdardyń 641 baıqaýshysy, saıası partıalardyń 15,5 myńnan asa baıqaýshysy, qoǵamdyq birlestikterden 30 myńnan asa baıqaýshy saılaýdy baqylaýdy júrgizdi. Saılaý ýchaskelerinde 1225 qazaqstandyq BAQ ókilderi, 23 eldiń 41 sheteldik BAQ-tyń akkredıttelgen jýrnalıseri aqparat taratty», - dedi Nurlan Ábdirov Ortalyq saılaý komısıasynda ótken brıfıńide.
Aıta keteıik, keshe 20 qarashada elimizde kezekten tys prezıdent saılaýy ótti. Barlyq óńirde 10 033 ýchaske jumys istedi. Al shet memleketterdegi Qazaqstan ókildikteri janyndaǵy 68 ýchaske qurylǵan.
Elimizdegi búkil saılaýshylardyń 69 paıyzy nemese 8 mln 282 myńnan astam adam óz tańdaýyn jasaǵan.
Sonymen birge, túnde Exit poll ádistemesi boıynsha júrgizilgen saýalnamalardyń alǵashqy qorytyndylary málim boldy.