Sýbsıdıalaý tártibi ózgeredi.
Aýyl sharýashylyǵy mınıstrliginiń málimetinshe, endi ósimdik sharýashylyǵy ónimderi jańa tártippen sýbsıdıalanady, dep habarlaıdy Almaty-akshamy.kz. 24.kz-ke silteme jasap.
Elimizdiń ósimdik sharýashylyǵy ónimderiniń ónimdiligi men sapasyn arttyrýdy sýbsıdıalaý qaǵıdalaryna ózgerister engizildi.
«Qaraqumyq jáne maıly daqyldar ósirýmen aınalysatyn aýyl sharýashylyǵy taýaryn óndirýshilerdi memlekettik qoldaý jáne osy daqyldardy qaıta óńdeýmen aınalysatyn kásiporyndardyń júktemesin ulǵaıtý úshin jáne ishki naryqtaǵy baǵany turaqtandyrý maqsatynda Qazaqstan Respýblıkasynyń Aýyl sharýashylyǵy mınıstrligi «Ósimdik sharýashylyǵy óniminiń ónimdiligi men sapasyn arttyrýdy sýbsıdıalaý qaǵıdalaryn bekitý týraly» Qazaqstan Respýblıkasy Aýyl sharýashylyǵy mınıstriniń 2020 jylǵy 30 naýryzdaǵy №107 buıryǵyna ózgerister men tolyqtyrýlar engizý týraly» 2021 jyldyń 10 tamyzyndaǵy №236 buıryǵyn qabyldady», - delingen QR ASHM taratqan málimette.
Buıryq bıylǵy jáne ótken jyldyń tórtinshi toqsanynda qaıta óńdeý kásipornyna nemese óńdeý qurylymdaryna qaıta óńdeýge berilgen ónim shyǵyndaryn ishinara óteý úshin qaraqumyq pen maıly daqyldar ósirgen fermerlerge nemese aýyl sharýashylyǵy kooperatıvterine sýbsıdıa tóleýdi kózdeıdi. Sonymen qatar buıryqta qorǵalǵan topyraqta ósiriletin qyzanaq pen qıar daqyldarynyń tuqymyna, tyńaıtqyshqa jáne pestısıdterge (bıoagentterge) jumsalǵan shyǵyndaryn ishinara óteý sharalary qarastyrylǵan.
Bul rette qyzanaq pen qıardyń elıtalyq tuqymdary jáne birinshi urpaq býdandarynyń tuqymdary boıynsha sýbsıdıalar qyzanaq pen qıardy ónerkásiptik jylyjaı keshenderinde qorǵalǵan topyraq jaǵdaıynda ósiretin fermerlerge (aýyl sharýashylyǵy kooperatıvterine) arnalady. Sonymen qatar, buıryqta jeke menshiginde nemese jer paıdalaný quqyǵynda ózge sanattaǵy (aýyl sharýashylyǵyna arnalmaǵan) jeri bar fermer (aýyl sharýashylyǵy kooperatıvi) aýyl sharýashylyǵy daqyldaryn ónerkásiptik jylyjaı kesheninde ósirgen kezde tuqymǵa, tyńaıtqyshqa, pestısıdke (bıoagentterge) sýbsıdıa tóleý normasy bar.