Ortalyq qalalyq klınıkalyq aýrýhana ota jasaýdyń jańa - aýtoplazmany engizý arqyly epıretınaldy membranany joıý ádisin qoldanatyn boldy, dep habarlaıdy almaty-akshamy.kz.
Ortalyq qalalyq klınıkalyq aýrýhana jańa ozyq medısınalyq tehnologıany engizýdi jalǵastyryp keledi.
Jaqynda munda hırýrgıalyq aralasýdyń jańa túri – aýtoplazmany engizýmen epıretınaldy membranany (membranopılıng) alyp tastaý sátti ıgerildi. Bul ınovasıalyq prosedýra makýlanyń tolyq nemese tolyq emes jyrtylýy oryn alǵan vıtreo-makýlárly tartý sındromy bar naýqastardy emdeýge arnalǵan
Vıtreo-makýlárly tartý sındromy - shyny tárizdi deneniń makýlaǵa, tordyń ortalyq bóligine qalyptan tys tartylýymen sıpattalatyn aýrý.
Aýrý makýlanyń deformasıasy men jyrtylýyna ákeledi, bul kórý qabiletiniń aıtarlyqtaı tómendeýine, keskinderdi burmalap qabyldaýǵa jáne ýaqtyly sharalar qabyldanbasa, soqyrlyqqa ákelýi múmkin.
"Ortalyq qalalyq klınıkalyq aýrýhanada engizilgen jańa ádis ınovasıalyq qadamdy epıretınaldy membranany alyp tastaýdy (membranopılıng) qamtıdy. Bul makýlanyń kerilýin joıýǵa baǵyttalǵan otanyń negizgi kezeńi.
Biz epıretınaldy membranany muqıat alyp tastaımyz, makýlany kerneýden bosatamyz jáne tordyń qalypty anatomıalyq ornyn qalpyna keltiremiz. Membranany alyp tastaǵannan keıin pasıenttiń aýtoplazmasy – ósý faktorlary men qorektik zattarǵa baı qan komponenti - makýla aımaǵyna engiziledi. Aýtoplazma tinderdiń tez jazylýyna yqpal etedi, regenerasıany jaqsartady jáne otadan keıingi asqyný qaýpin azaıtady", - deıdi oftalmologıa bóliminiń meńgerýshisi Gúlzat Abdraımova.
Bul ádistiń birneshe negizgi artyqshylyǵy bar: jedeldetilgen emdeý, óıtkeni aýtoplazma makýla tinderiniń tez qalpyna kelýine jáne asqyný qaýpin azaıtýǵa kómektesedi, ıaǵnı qabyný prosesi men otadan keıingi basqa asqynýdyń yqtımaldyǵyn azaıtady.
Gúlzat Abdraımova jańa prosedýradan ótken alǵashqy naýqastar kórý qabiletin qalpyna keltirýde oń dınamıkany kórsetetinin atap ótti.
Naýqastardyń kópshiliginde vızýaldy fýnksıanyń aıtarlyqtaı jaqsarýy jáne vıtreo-makýlárly tartý sındromy sımptomdarynyń tómendeýi baıqalady.
"Barlyq qyzmetkerge rahmet, keremet ujym. Gúlzat Talǵatqyzy naǵyz sıqyrshy, Men sol kózimniń tek 1 paıyzy ǵana kóretin qalypta aýrýhanaǵa tústim. Qazir óte jaqsy kóremin. Men bul aýrýhanada osyndaı ota jasaı bastaǵanyn estigen boıda birden kelistim. Munda portal arqyly keldim. Aq halatty abzal jandarǵa rahmet", - deıdi naýqas.