Halyqaralyq nashaqorlyqqa jáne esirtkiniń zańsyz aınalymyna qarsy kúres kúnine oraı elimizde profılaktıka aılyǵy bastaldy, – dep habarlaıdy almaty-akshamy.kz.
Memlekettik qurylymdar men úkimettik emes uıymdar esirtkini qoldaný qaýpi jáne onyń saldary týraly azamattarǵa habarlap, aldyn alý sharalaryn birlesip ótkizedi. Tek alǵashqy aptanyń ózinde 445 is-shara uıymdastyryldy. Azamattar psıhoaktıvti zattardy jarnamalaıtyn nemese esirtkini qoldanýdy nasıhattaıtyn dúnıelerdi taratý úshin qylmystyq jaýapkershilik qarastyrylatynyn bilmeı jatady. Esirtkini taratqany jáne saqtaǵany úshin qylmystyq jaýapkershilik 16 jastan, keıbir jekelegen esirtki quqyq buzýshylyqtary úshin 14 jastan bastalady. Búginde İİM kámeletke tolmaǵandar arasynda esirtki qylmystarynyń aldyn alýǵa basa nazar aýdaryp otyr.
– Ókinishke oraı, bıyl bes aı ishinde 20 jasóspirim jaýapqa tartyldy. Biz bilim berý organdarymen birlesip, osyndaı qylmystardyń alǵysharttary men sebepterin anyqtap, olardy joıý boıynsha jumystar júrgizemiz. Kúndiz nashaqorlyq máselesi týraly dáriske qatysyp, suraqtar qoıyp, belsendilik tanytyp otyrǵan jasóspirimniń keshe esirtki jasyryp ustalǵan jaǵdaılary da bar, – dedi İİM esirtki qylmysyna qarsy is-qımyl departamentiniń bastyǵy Qajyǵalı Imajanov.
Shara barysynda poshta jóneltilimderi jáne tasymaldaýmen aınalysatyn kólikterge nazar aýdarylady. Qyzmettik ıtterdiń qatysýymen avtobeketterde, poıyzdarda, áýejaılarda tekserýler júrgiziledi. Sonymen qatar kınolog mamandar mektep pen kolej jastaryna túsindirý jumystaryn júrgizýdi kúsheıtetin bolady.