Meshittiń jalpy aýdany 57 myń sharshy metr bolady.
Elimizdiń astanasynda Qazaqstan men Ortalyq Azıadaǵy eń úlken jańa meshittiń saltanatty ashylýy ótti, dep habarlaıdy Almaty-akshamy.kz.
Kók tústi bas kúmbeziniń bıiktigi 83,2 metrge jýyq, dıametri 62 metr bolady.
Tórt munaranyń bıiktigi - 130 metr. Ár munara bes bólikten turady, olar ıslamnyń bes tiregi - ıman, namaz, oraza, zeket jáne qajylyqty beıneleıdi. Sol qanattaǵy bir munara kelýshilerge ashylady. Qonaqtar lıftpen kóterilip, kórinisti tamashalaı alady.
Meshittiń kire beris esigi álemdegi eń bıik aǵash esikterdiń biri sanalady. Ol tropıkalyq Afrıkada ósetin ıroko qatty aǵashynan qolmen jasalǵan. Onyń bıiktigi 12,4 metr, salmaǵy bir jarym tonna. Esikteri qazaqy órnektermen bezendirilgen. Al syrtqy qabyrǵalarynda kógildir fonǵa aq arab jazýy jazylǵan.
Meshittiń qabyrǵalary men kúmbeziniń ishi túrli-tústi oıýlar, órnekter, Quran aıattary jáne duǵalarmen bezendirilgen. Biraq negizinen qazaq órnekteri salynǵan.
Arab kallıgrafıasyn qazaq sheberi Asylbek Baızaquly jazǵan.
Meshittiń ishki esikteriniń bıiktigi 12 metr, terezeleri túrli-tústi oıý-órnektermen bezenderilgen áınekten jasalǵan.
Qubyla jaqtaǵy qabyrǵada Allanyń 99 esimi qashalǵan. Mozaıka qabyrǵanyń uzyndyǵy 100 metr, bıiktigi 22,4 metr. Mozaıka túrli tústi 25 mıllıon áınekten quralǵan.
Úlken zal men áıelder namaz oqıtyn jer tolyǵymen qazaqy oıý-órnektermen kómkerilgen. Kilemniń jalpy aýdany 15 525 sharshy metr – bul álemdegi qoldan jasalǵan eń úlken kilem. Kilemniń qalyńdyǵy 15 mıllımetr. Ol Jańa Zelandıada 100 paıyz júnnen toqylǵan.
Meshittiń jalpy aýdany 57 myń sharshy metr bolady. Ǵımarattyń aınalasynda úlken saıabaq bar. Meshit ornalasqan jer teliminiń aýdany - 10 gektar.