Abaı ýnıversıtetiniń Sorbonna–Qazaqstan ınstıtýtynda Fransıanyń Ortalyq Azıany zertteý ınstıtýty (IFEAC) men Fransıanyń Qazaqstandaǵy elshiliginiń qoldaýymen uıymdastyrylǵan «Ortalyq Azıanyń Fransýz zertteýleri: qatysýshylar jáne ózekti ahýaly» taqyrybynda ǵylymı semınar ótti.
Abaı ýnıversıteti óz alańynda fransýz zertteýshileri arasyndaǵy ǵylymı dıalogty baıytý, bilim kókjıegin keńeıtý, belsendi bilim men tájirıbe almasý maqsatynda jetekshi otandyq jáne fransýz zertteýshileriniń basyn qosty. İs-sharaǵa Abaı atyndaǵy QazUPÝ-dyń Basqarma tóraǵasy- rektory Bolat Tilep, Fransıanyń Qazaqstandaǵy elshiliginiń bilim salasyndaǵy yntymaqtastyq jónindegi aımaqtyq attashesi Ksave Le Torrıvellek, Sorbonna–Qazaqstan ınstıtýtynyń dırektory, QR Prezıdentiniń janyndaǵy Ulttyq quryltaıdyń múshesi, Adam quqyqtary jónindegi komısıanyń múshesi Aınur Sábıtova, fransýz ǵalym- dary – Sorbonna–Qazaqstan ınstıtýtynyń negizin qalaýshylardyń biri Katrın Pýjol, IFEAC dırektory Adrıen Fov, ınstıtýttyń áriptes-professory Olıve Ferrando, Ortalyq Azıa tarıhy boıynsha kóptegen eńbekterdiń avtory Ksave Allez, jas zertteýshiler men doktoranttar qatysty.
Bolat Tilep semınardyń mańyzdylyǵyna toqtalyp, Sorbonna–Qazaqstan ınstıtýtyn búkil Ortalyq Azıada teńdesi joq biregeı birlesken joba ekenin atap aıtty. «Osy ýaqyt ishinde ınstıtýt súbeli jetistikke jetti. Atap aıtqanda, qos dıplomdyq baǵdarlama men stýdentterdiń ózara almasý tájirıbesi jańa deńgeıge kóterildi. Instıtýt joǵary deńgeıdegi halyqaralyq is-sharalar alańy men túlekterimiz úshin jańa kásibı baspaldaq boldy. Desek te, búginde ýnıversıtet pen eldiń óz talaby, naqty múddesi bar. Bul – Sorbonna–Qazaqstan ınstıtýtyna erekshe jaýapkershilik júkteıtin jańa formasıadaǵy pedagogtardy daıarlaý. Fransýzdyq áriptes terimizben birge ǵylymı-zertteý men bilim berý baǵdarlamasy, sonyń ishinde til bilimi salasynda úlken bastamalardy kóteretin ýaqyt keldi dep oılaımyn», – dedi rektor.
Semınarda osy saladaǵy zertteýdiń ózekti taqyryby talqylanyp, zamanǵa saı zertteý baǵyttaryna sholý jasaldy, Ortalyq Azıamen baılanysty ǵylymı jumys pen jobalar usynyldy. Qatysýshylar arasyndaǵy pikirtalas pen dıalogtar tájirıbe men ıdeıa almasýǵa qyzmet etti. Semınardyń qos tarapqa da óte jemisti ári paıdaly bolǵany aıtyldy.
Taqyrypqa oraı
YNTYMAQTASTYQ DAMIDY
«Sorbonna–Qazaqstan ınstıtýtynyń negizin qalaýshylardan Qazaqstan men fransýz ǵalymdarynyń yntymaqtastyǵy jaıynda suradyq: «Búgin – erekshe kún, óıtkeni búgingi semınarda fransýz zertteýshilerin kezdestirýge bolady. Bul – birneshe kúnnen beri Almatyda ótip jatqan ǵalymdardyń úlken sezi. Abaı atyndaǵy QazUPÝ-dyń jańa rektoryn qarsy alamyz. Bul – bizdiń yntymaqtastyǵymyzdyń jańa kezeńi, ISK-nyń da, Abaı atyndaǵy QazUPÝ-dyń da odan ári damýyna jańa serpin bergenin qalaımyz. ISK stýdentterimen birge jumys isteıtin zertteýshilerdi Fransıada jumysqa ornalasýy men oqýyna jol ashatyn jańa perspektıva kútýde. Fransýz ýnıversıtetteriniń keıbir oqytýshylary ISK men Abaı atyndaǵy QazUPÝ-men birlesip jumys isteýde. Biz ISK stýdentteriniń osy almasýǵa qatysý men osy yntymaqtastyqty odan ári damytý múmkindigine ıe bolǵanyn qalaımyz», – dedi Katrın Pýjol myrza.
A.QYDYRBAIULY