Órtti aýyzdyqtaýǵa 12 tehnıka men jeke quramnyń 40 qutqarýshysy jumyldyryldy.
Búgin 11 saǵat: 33 mınýtta Almaty qalalyq TJD 101 qyzmetine Naýryzbaı aýdanyndaǵy Raıymbek dańǵyly 548/2 meken-jaıynda órt shyqqany týraly habarlama kelip tústi, dep habarlaıdy Almaty-akshamy.kz
Órt sóndirýshiler kelgennen keıin, bir qabatty ǵımarattyń shatyry órtenip jatqanyn anyqtady. Órt sóndirý kúshteri men quraldary joǵary shaqyrtý dárejesi boıynsha tartyldy. Órt ornynda shtab qurylyp, Batys jáne ońtústik-shyǵys jaǵynan eki órt sóndirý ýchaskesi quryldy, sý kózderiniń az bolýyna baılanysty, órtke qarsy poezd jumyldyrylyp, magıstraldy jeli tartylyp, oqpandar arqyly úzdiksiz sý berý qamtamasyz etildi, janyp jatqan shatyrdyń qurylymdaryn ashý úshin eki órt satysy iske qosyldy.
Órtti sóndirý jumystary konstrýktıvtik erekshelikterine baılanysty kúrdelene tústi: shatyr kóp qabatty: beton plıtasynyń ústine bıtým mastıkasy, onyń ústine metalo- shıfer tóselgen.
Tilsiz jaý 12:39-da aýyzdyqtalyp, 12:47-de sóndirildi, jaqyn ornalasqan eki boksqa órttiń taralýyna jol berilgen joq. Qazir qurylymdardy bólshekteý jáne tógý jumystary júrgizilýde.