Almatyda Qurban aıtty merekeleýde karantındik sharalardyń saqtalýyn baqylaý jalǵasýda. Qalaǵa 600-den astam mal basyn ákelýge ruqsat berilgen joq.
Rásimdi tek dinı qyzmetker men senimdi adamdar arnaıy belgilengen jerde ótkizedi. Basqa azamattar qurban2021.kz saıt arqyly onlaın rejıminde qurbandyq shalý rásimine tapsyrys bere alady, dep habarlaıdy Almaty-akshamy.kz
Almaty qalasynda qatań shekteýler qoıylǵan. Mal soıý sehynyń jumysyna, jappaı is-sharalar, ujymdyq namaz, sondaı-aq mal ákelýge tyıym salyndy.
Qasıetti merekege oraı bir jarym kúnniń ishinde muqtaj 1453 adamǵa qurbandyqqa shalynǵan maldyń eti taratyldy. Almatylyqtarǵa karantın jaǵdaıynda Qurban aıt merekesin toılaý erejeleri taǵy da eskertildi.
Almaty qalasynyń aýmaǵynda polısıa men vetbaqylaý beketteri ashylǵan, olar qalaǵa mal ákelip satýǵa tyrysqan jandardyń áreketterine tyıym salady. Bul megapolıstiń bas sanıtarlyq dárigeriniń aıt kúnderi mal soıýǵa ári satýǵa tyıym salýyna baılanysty. Óıtkeni qurbandyq shalý rásimine adam kóp jınalady. Bul koronavırýs ınfeksıasynyń taralýyna ákelýi múmkin.
QR ASHM Veterınarıalyq baqylaý jáne qadaǵalaý komıtetiniń Almaty qalasy boıynsha aýmaqtyq ınspeksıasynyń derekteri boıynsha, kezekshilik kezinde ınspeksıa qyzmetkerleri 16 - 20 shilde aralyǵynda qaladan tys jerde 31 iri qara mal, 571 usaq mal, 3 jylqyny keri qaıtardy.
«Inspeksıa qyzmetkerleri Almaty qalasynyń aýmaǵynda veterınarıalyq-sanıtarlyq baqylaý men qadaǵalaýdy kúsheıtti. Turǵyndarǵa túsindirme jumystary júrgizildi, qalanyń barlyq segiz aýdany tekserildi. Bazar men et kombınattary, mal soıý alańdary, sondaı-aq qala meshitteri tekserildi», - dedi QR ASHM Veterınarıalyq baqylaý jáne qadaǵalaý komıtetiniń Almaty qalasy boıynsha aýmaqtyq ınspeksıasynyń bıologıalyq qaýipsizdik bóliminiń basshysy Nurlan Táshimov.
Mal soıý sehy men bazarlardyń jumysy toqtatyldy. Mal soıý men olardy satýǵa tyıym salyndy. Alaıda Alataý aýdanynda Balqýraı-Molodejnaıa kósheleriniń qıylysynda belgilenbegen jerde 100 bas usaq mal satý faktileri anyqtaldy. Tártip buzýshylarǵa túsindirme jumystary júrgizildi. Ákelgen maldaryn qala syrtyna shyǵaryp tastady.
Búginde qala aýdandarynda zańsyz mal soıý men satý boıynsha baqylaý jumystary jalǵasýda. Qala mańyna qoıylǵan beketter Qurban aıt merekesiniń sońyna deıin jumys isteıtin bolady.
Almaty qalasy Din isteri basqarmasy qala turǵyndaryna Qurban aıt merekesine arnalǵan qurbandyq shalý rásimi úshin bazar men jeke menshikterde tiri mal satyp alý múmkin emes dep alańdamaýǵa shaqyrdy. Muny onlaın rejımde jasaýǵa bolady. Onyń algorıtmin musylmandardyń dinı basqarmasy jasap qoıdy.
Búginde 341 eshki, 112 qoı jáne 30 iri qara malǵa onlaın túrde ótinish berildi. Qurbandyq etin shamamen 1500 adam aldy. Bul shara bárimiz úshin jaqsy, óıtkeni koronavırýsty juqtyrý qaýpi edáýir tómendeıdi deıdi din qyzmetkerleri.
«Internettegi qurbandyq tek belgilengen jerde bolady. Rásimdi ótkizýge arnaıy top bekitilgen, bógde adamdarǵa kirýge tyıym salynǵan, barlyq jumys sanıtarlyq talaptarǵa sáıkes júrgiziletin bolady», - dedi Almaty qalasy Ortalyq meshitiniń naıb ımamy Madıar Pirimqulov.
Din ókilderi jurtshylyqty Qurban aıt merekesine jaýapkershilikpen qaraýǵa shaqyrdy. Bul kúnderi úıde bolyp, qonaqqa barmaǵan jón, ári is-shara uıymdastyrmaý kerek. Qazirgi kúrdeli kezeńde qala turǵyndary úlken jaýapkershilik tanytyp, qaýipti ınfeksıanyń taralýyna tosqaýyl bolýlary tıis.