6 qazanda ótetin respýblıkalyq referendýmdy ázirleý men ótkizý boıynsha 2024 jylǵy 16 qyrkúıekte QR Ortalyq referendým komısıasynyń keńeıtilgen otyrysy ótti, dep habarlaıdy aqshamnews.kz
Bul otyrysta kelesi máseleler talqylandy:
- Múgedektigi bar adamdar úshin qolaıly jaǵdaılardy qamtamasyz etý;
- Jergilikti atqarýshy organdardyń daýys berý ýchaskelerin materıaldyq-tehnıkalyq jaraqtandyrýy, múgedektigi bar adamdardyń quqyqtaryn qorǵaý, sondaı-aq respýblıkalyq referendýmǵa qatysýǵa quqyǵy bar azamattardyń tizimderin usyný jónindegi jumystary;
- Referendým kezinde daýys berýge arnalǵan búletenderdi daıyndaý;
- Referendýmda daýys berý tártibi;
- Halyqaralyq uıymdar men shet memleketterdiń baıqaýshylaryn akredıtteý.
Otyrysqa ORK músheleri, Syrtqy ister mınıstrligi, Sıfrlyq damý, ınovasıalar jáne aeroǵarysh ónerkásibi mınıstrligi, İshki ister mınıstrligi ókilderi, sondaı-aq BAQ ókilderi qatysty. Sonymen qatar, oblystardyń, Astana, Almaty, Shymkent qalalarynyń aýmaqtyq referendým komısıalarynyń músheleri jáne ákimdikterdiń ókilderi beınekonferensıa arqyly qosyldy.
Otyrystyń alǵashqy máselesi boıynsha ORK múshesi Anastasıa Shegorsova baıandama jasap, múgedektigi bar adamdar úshin saılaý quqyqtaryn qamtamasyz etý komısıa qyzmetiniń basymdyǵy ekenin atap ótti. Ol referendýmǵa arnalǵan ýchaskelerde múgedektigi bar adamdarǵa qolaıly jaǵdaı jasaý boıynsha qajetti sharalar qabyldanǵanyn jetkizdi.
Otyrystyń kelesi máselelerinde referendým ýchaskelerin daıyndaý, ýchaskelik komısıalardyń múshelerin oqytý jáne azamattardyń daýys berý tizimin qalyptastyrý sıaqty mańyzdy máseleler qarastyryldy. Sonymen qatar, daýys berý kezinde búletenderdi durys toltyrý jáne baıqaýshylardyń qatysý tártibi túsindirildi.
Qorytyndysynda, halyqaralyq baıqaýshylardy akredıtteý máselesi talqylandy. Táýelsiz Memleketter Dostastyǵy baıqaýshylarynyń mısıasy jáne birneshe shet memleketterdiń baıqaýshylary akredıtasıadan ótti.