Almaty qalasyndaǵy «Ǵylym ordasy» ǵımaratynda Qazaq-Nemis ǵylymı-zertteý yntymaqtastyq ortalyǵy (KGRCC) resmı ashyldy. 
Bul shara Germanıa Federaldy kansleri Olaf Sholstyń Qazaqstanǵa jasaǵan memlekettik sapary aıasynda uıymdastyryldy. Ortalyq Qazaqstan Respýblıkasynyń Prezıdenti janyndaǵy Ulttyq ǵylym akademıasy men Qazaqstan-Nemis ýnıversıtetiniń (QNÝ) seriktestiginiń negizinde quryldy, dep habarlaıdy aqshamnews.kz.
Ashylý rásiminde Qazaqstan Ulttyq ǵylym akademıasynyń prezıdenti, profesor Aqylbek Qajyǵululy Kúrishbaev pen Qazaqstan-Nemis ýnıversıtetiniń prezıdenti, profesor Volrad Rommel quttyqtaý sózderin sóıledi. Eki eldiń basshylary jańa Ortalyqtyń Qazaqstan men Germanıa arasyndaǵy ǵylymı baılanystardy keńeıtip, birlesken zertteý jobalaryn júzege asyrýǵa jáne ǵylym men tehnologıa salasyndaǵy ınovasıalardy damytýǵa strategıalyq mańyzdylyǵyn atap ótti.
Bul ortalyq Akademıanyń jańartylǵan ǵımaratynda júzege asyrylǵan alǵashqy halyqaralyq joba retinde aıryqsha mańyzǵa ıe jáne Akademıa tarıhyndaǵy jańa kezeńniń bastaýyn bildiredi.
Rásimge Qazaqstan men Germanıanyń ǵylymı jáne bilim berý salalarynyń joǵary dárejeli ókilderi, sonyń ishinde Qazaqstan Ulttyq ǵylym akademıasy men Qazaqstan-Nemis ýnıversıtetiniń basshylyǵy qatysty. Sonymen qatar, Nemis zertteý qoǵamynyń (DFG) halyqaralyq baılanystar bóliminiń jetekshisi doktor Iorg Shnaıder bastaǵan delegasıamen jumys kezdesýi uıymdastyryldy. DFG ýnıversıtetter men ǵylymı-zertteý mekemelerindegi ǵylymı jobalardy qarjylandyrý arqyly ǵylymnyń barlyq salalaryna qoldaý kórsetip, jas ǵalymdardy qoldaýǵa jáne ǵylymdaǵy genderlik teńdikti qamtamasyz etýge erekshe nazar aýdarady.
Kezdesý barysynda Qazaqstan men Germanıa arasyndaǵy ǵylymı yntymaqtastyqty keńeıtý perspektıvalary, birlesken zertteý jobalaryn qarjylandyrý jáne ǵalymdar úshin jelilik bastamalardy qurý máseleleri talqylandy.
İs-sharanyń qorytyndysynda Qazaq-Nemis ǵylymı-zertteý yntymaqtastyq ortalyǵyn (KGRCC) qurý týraly resmı kelisimge qol qoıyldy. Bul ortalyq Qazaqstan men Germanıa arasyndaǵy akademıalyq jáne ǵylymı baılanystardy nyǵaıtýǵa, uzaq merzimdi halyqaralyq áriptestikterdi damytýǵa, sondaı-aq ozyq zertteý jobalaryn júzege asyrýǵa mańyzdy platforma bolady dep kútilýde.