Halyqty evakýasıalaý jáne ýaqytsha ornalastyrý úshin tórt evakýasıalyq pýnkt daıyndaldy.
Túrkistan oblysynyń Ordabasy aýdanyndaǵy «Naıman» jáne «Qurtaı» kanaldarynan tasyǵan sý Arys ózenine quıylyp jatyr, dep habarlaıdy Almaty-akshamy.kz Tótenshe jaǵdaılar mınıstrliginiń baspasóz qyzmetine silteme jasap.
Túrkistan oblysynyń ákimi Darhan Satybaldy Saýran aýdanyndaǵy sý tasqynyna baılanysty ózge de aýdan, qalalardaǵy jaǵdaıdy saralaý maqsatynda Tótenshe jaǵdaı departamentinde shtabtyń shuǵyl keńesin ótkizdi. Jıynǵa tótenshe jaǵdaı departamenti men polısıa departamentiniń basshylyǵy, basqarma basshylary qatysty. Óńir basshysy qazirgi ahýalǵa toqtalyp, tasqyn sý saldaryn joıý jáne qaýipsizdik sharalaryn kúsheıtý jóninde tapsyrma berdi.
«Sý tasqynynyń aldyn alý boıynsha josparlar jasalyp, tıisti jumystar qolǵa alyndy. Qaýipti aımaqtarǵa tehnıka men kúshti jumyldyryp jatyrmyz. Biraq jaýyn-shashynnyń mólsherden artyq túsýi, aýa raıynyń kúrt jylynýynan qardyń tez erýi birneshe aýyldy ábigerge salyp otyr. Keshe oblystaǵy sý nysandary men ózenderdi qarap shyqtyq. Barlyq aýdan, qalada kúsheıtilgen rejımde jumys jalǵasyp, qaýipsizdik sharalary saqtalýy tıis», – degen Darhan Satybaldy ár aýdanda, aýylda keltirilgen shyǵyndy esepteý boıynsha arnaıy komısıalar jasaqtaýdy tapsyrdy.
Túrkistan oblysy boıynsha Tótenshe jaǵdaılar departamentiniń bastyǵy Nurǵalı Júnisov sý tasqynyna baılanysty sońǵy derekterdi baıandady. Onyń aıtýynsha, barlyq aýdan, qalada jumys kúsheıtilip, sý nysandary baqylaýǵa alynǵan. Jaýyn-shashyn kóp túsýine jáne qardyń erýine baılanysty Báıdibek, Saýran, Ordabasy aýdandaryndaǵy birneshe aýyldaǵy úılerdiń aýlalaryn sý basty. Erigen qar sýy 15 eldi mekendegi kósheler men aýla ýchaskeleri arqyly aǵyp ótti. Qazirgi tańda 13 kóshe, 186 aýla aýmaǵy, 1 turǵyn jeke úıge sý kirgen. TJD kúshimen sý basqan aýla aýmaǵynan 154 adam jáne 200 bas usaq mal evakýasıalanǵan. Ol adamdar týystarynyń úılerine jaıǵasty. Halyqty evakýasıalaý jáne ýaqytsha ornalastyrý úshin Saýran aýdanynda 4 evakýasıalyq pýnkt daıyndaldy.
Tótenshe jaǵdaılar mınıstrliginiń málimetinde, oblystyq mańyzy bar 11 avtomobıl jolynyń 23 ýchaskesinde sý jınalǵan. Ordabasy aýdanyndaǵy Naıman jáne Qurtaı kanalynda sý deńgeıi kóterildi, qazirgi ýaqytta sý Arys ózenine quıylýda. Úılerdi sý basýǵa jol bermeý maqsatynda 2500 birlik kóleminde qapshyqtardy tóseý jumystary júrgizilýde. Maıdantal aýylynda sýdy qashyrtý úshin jasandy kanaldar qazylyp, aýla ýchaskelerin sý basý qaýpi seıildi. Qazirgi ýaqytta qurbandar men zardap shekkender joq. Jaýyn-shashyn oblys aýmaǵynda toqtady. Alaıda sý aǵyny jalǵasýda. Sýdy qashyrtýǵa barlyǵy 308 adam, 51 birlik tehnıka, 25 motopompa, 1 júzý quraly jumyldyryldy.
Óńir basshysy birneshe basqarma basshysynyń osy jaǵdaıǵa baılanysty atqarǵan jumystaryn saralady. Tapsyrmalar berdi. Qurylys basqarmasy tarapynan sý basqan aýyldarǵa tehnıkalar jiberilgen. Qoǵamdyq densaýlyq basqarmasynyń basshysy jedel medısınalyq kómek brıgadalary jasaqtalǵanyn málimdedi. Aýyl sharýashylyǵy men jol salasyna jaýapty basqarma basshylary joldardy retke keltirý, avtobýspen qamtý, oblysqa tıesili kanaldardy tıimdi paıdalaný baǵytyndaǵy jumystardy baıandady.