QMA Batys Qazaqstan oblysy boıynsha departamenti «Imrat Group» atty qarjy pıramıdasynyń qyzmetin toqtatty.
Kanadanyń, Gonkong pen Ulybrıtanıanyń atynan tirkelgen jalǵan halyqaralyq ınvestısıalyq kompanıa retinde kórinip, alaıaqtar azamattarǵa kúndelikti 0,5%-dan 1,5%-ǵa deıin «joǵary tabys» ýáde etken túrli baǵdarlamalardy usynǵan, - dep habarlaıdy Aqshamnews.kz.
Qatysý úshin azamattar arnaıy referaldy silteme arqyly tirkelip, krıptovalúta ámıanyna 20-dan 10 000 AQSH dollaryna deıin (USDT balamasynda) qarajat aýdarýy qajet bolǵan.
Alaıda shyn máninde, salymdar tek pıramıda ishindegi qatysýshylar arasynda qaıta bólinip otyrǵan – burynǵylarǵa tólemder jańadan tartylǵan qarajat esebinen júrgizilgen.
Qatysýshylardy tartý maqsatynda kúdiktiler zańdy ınvestısıalyq qyzmet túrinde kórsetý úshin belsendi jarnama júrgizip, keńseler jaldap, túrli prezentasıalar men konferensıalar uıymdastyrǵan. Sondaı-aq, Telegram-arna ashyp, onda turaqty túrde joǵary tabys pen ınvestısıalardyń qaýipsizdigin nasıhattaıtyn beınematerıaldar jarıalap otyrǵan.
Zańsyz qyzmet der kezinde toqtatylǵanynyń arqasynda pıramıdaǵa barlyǵy 30 azamat tartylǵan. Olardyń salǵan qarajaty 89 mln teńgeden asady.
Qylmystyq is sotqa joldandy.
QR Qylmystyq-prosestik kodeksiniń 201-babyna sáıkes ózge aqparat jarıa etilmeıdi.
Qarjylyq monıtorıń agenttigi qarjy pıramıdalarynyń jolyn kesý jáne olardy anyqtaý boıynsha júıeli jumystardy jalǵastyrýda.
2025 jyldyń basynan beri:
- 31 qarjy pıramıdasyna qatysty 90 sotqa deıingi tergep-tekserý aıaqtaldy;
- 7 mlrd teńge kóleminde zalal óteldi;
- jalǵan ınvestısıalyq jobalar týraly aqparat taratqan 14 myńnan astam ınternet-resýrs buǵattaldy;
- Instagram men Telegram platformalarynda 535 myńǵa jýyq qatysýshysy bar 100-den astam zańsyz chattar jabyldy.
QMA saıtynda qarjy pıramıdalarynyń tizimi jarıalanǵan.
Qarjy pıramıdalarynyń belgilerin tekserýge arnalǵan «Baiqa, piramida!» Telegram-boty iske qosyldy.
Eger Siz nemese jaqyndaryńyz qarjy pıramıdasynyń qyzmetine tap bolsańyz, turǵylyqty jerińiz boıynsha Ekonomıkalyq tergep-tekserý departamentine habarlasýyńyzdy suraımyz.
Azamattardy qyraǵy bolýǵa jáne óz jınaqtaryn kúmándi qarjylyq jobalarǵa salmaýǵa shaqyramyz.