Qazaqstanda jyl basynan beri 326,3 myń tonna nan óndirildi. Álemde jyl saıyn 16 qazan Nan kúni retinde atalyp ótiledi.
Qazaqstan astyqqa baı, álemdik naryqta óz ornyn bekitken, ishki naryqty tolyqtaı qamtamasyz etken, nandy asa qadirleıtin ári nan pisirýde ózindik dástúrin qalyptastyrǵan el.
Ótken jyly elimizde 510,1 myń tonna nan, al aǵymdaǵy jyldyń 8 aıynda – 326,3 myń tonna óndirilgen, - de habarlaıdy Aqshamnews.kz.
Nan zaýyttarynyń óndiristik qýaty jylyna 457,4 myń tonna.
Ónimniń negizgi bóligi – bıdaıdan pisirilgen qalypty nan, úlestik salmaǵy jalpy assortımenttiń shamamen 60% tıesili.
Tutynýshylar suranysyna qaraı ónim túrleri jyl saıyn kóbeıýde. Onyń qatarynda tek nan túrleri ǵana emes, sonymen qatar qysqa jáne uzaq merzimge saqtalatyn toqash, unnan jáne kondıterlik ónimder de bar.
Elimizdiń 2021–2030 jyldarǵa arnalǵan AÓK damytý tujyrymdamasy aıasynda aýyl sharýashylyǵy ónimderin qaıta óńdeıtin kásiporyndarǵa memlekettik qoldaý sharalary qarastyrylǵan.
Atap aıtqanda, jylyna 2 myń tonnadan astam qýaty bar nan-toqash nemese kondıterlik ónimder shyǵaratyn kásiporyndarǵa ınvestısıalyq shyǵyndardyń 25%-yn óteý túrinde qoldaý kórsetiledi.
Budan bólek, un óndirýshiler úshin salyqtyq jeńildikter bar. Mysaly, Salyq kodeksiniń 411-babyna sáıkes, bul saladaǵy QQS mólsherlemesi 70%-ǵa tómendetilgen.
Qazaqstandaǵy nan óndirisi ishki naryqtaǵy qajettilikti tolyq qamtıdy.
Árbir qamyr ónimi dıqannyń, dıirmenshiniń, naýbaıshynyń jáne logısttiń mańdaı terimen keledi.
«Egis dalasynan – dúken sóresine deıin» jalǵasatyn turaqty óndiris tizbeginiń arqasynda halqymyz kún saıyn sapaly ári qoljetimdi nanmen qamtamasyz etilip otyr.