Darhan Satybaldy: «Taza Qazaqstan» – bul qalaǵa kúndelikti qamqorlyq»
Almaty qalasynyń ákimi Darhan Satybaldynyń tóraǵalyǵymen «Taza Qazaqstan» baǵdarlamasynyń júzege asyrylý barysyna arnalǵan jıyn ótti, - dep habarlaıdy Aqshamnews.kz.
Kezdesýde ekologıalyq kúzgi aılyqtyń qorytyndylary, jalpyqalalyq senbilik pen sanıtarlyq tazalyqqa baǵyttalǵan reıdter men aldyn alý sharalarynyń nátıjeleri talqylandy.
Ekologıalyq aılyq barysynda megapolıstiń barlyq segiz aýdanynda senbilikter uıymdastyryldy. Ásirese, aryqtardy tazalaýǵa, aıaldamalar men aýlaishilik aýmaqtardyń rettiligine basa mán berildi.
Sonymen qatar, turǵyndar «Jasyl aýla» atty ekologıalyq aksıaǵa belsene atsalysyp otyr. 18-19 qazan kúnderi aýlalar men kóshelerdi kógaldandyrý maqsatynda kóshetter taratylady.
Qala ákimi atap ótkendeı, «Taza Qazaqstan» ekologıalyq bastama ǵana emes, komýnaldyq qyzmetterdi, aýdan ákimdikteri men qala turǵyndaryn ortaq maqsatqa biriktiretin júıeli jumysqa aınaldy. Darhan Satybaldy jaýapty qyzmetter arasyndaǵy úılesimdilikti kúsheıtip, turǵyndardan kelip túsetin ótinishter men shaǵymdarǵa der kezinde jaýap berýdi jáne ekologıalyq mádenıetti arttyrý baǵytynda túsindirý jumystaryn jalǵastyrýdy tapsyrdy.
Almaty polısıa departamentimen birlese otyryp, ekologıalyq jáne ákimshilik zańnamalardyń oryndalýyn qamtamasyz etý sharalary júzege asyrylyp keledi.
Jyl basynan beri qala aýmaǵynda júzge jýyq zańsyz qoqys úıindileri joıyldy. Olardyń materıaldary ekologıa departamenti men aýdan ákimdikterine joldanyp, tıisti sharalar qabyldanýda. Qala aýmaǵy turaqty túrde beınemonıtorıng arqyly baqylanyp, málimetter Almaty polısıa departamentiniń jedel basqarý ortalyǵyna jiberiledi. Ákimniń tapsyrmasymen zańsyz suıyq qaldyqtardy tógýge qarsy kúres te kúsheıtilip otyr.
Darhan Satybaldy atmosferalyq aýanyń sapasyn arttyrý, ekologıalyq monıtorıń júıesin damytý jáne turǵyndardyń qala tazalyǵyn saqtaýdaǵy belsendiligin arttyrýdyń mańyzdylyǵyn atap ótti. Ákim ekologıa basqarmasy men polısıa departamentine ruqsatsyz qoqys tógý, aryq júıelerin lastaý sıaqty ekologıalyq zań buzýshylyqtardyń aldyn alý maqsatynda turaqty reıdter uıymdastyrýdy júktedi.