Oralda dárigerler 12 jastaǵy qyzdyń asqazanynan jarty kelige jýyq shash alyp shyqty, dep habarlaıdy Aqshamnews.kz tilshisi.
Batys Qazaqstan oblysyndaǵy medısına qyzmetkerleri sırek ári kúrdeli jaǵdaımen betpe-bet keldi. Birneshe aı boıy ishtiń aýyrýy, tábettiń tómendeýi men álsizdikke shaǵymdanǵan qyzdy tekserý barysynda onyń asqazanynan tyǵyzdalǵan bógde zat — shash massasy tabylǵan.
Mamandardyń aıtýynsha, bul jaǵdaı trıhobezoar dep atalady. Ol trıhotılomanıa (shash julý) men trıhofagıa (shash jeý) sekildi psıhologıalyq aýytqýlardyń saldarynan damıdy.
Qyzdyń ata-anasy bastapqyda belgilerge mán bermegenimen, qyzdyń jaǵdaıy nasharlaı bastaǵan soń, ony shuǵyl túrde aýrýhanaǵa jetkizgen. Dárigerler ota jasap, onyń asqazanynan shamamen 500 gram shashty alyp shyqty. Operasıa sátti ótti. Qazir pasıenttiń jaǵdaıy birqalypty.
Medısına qyzmetkerleriniń aıtýynsha, mundaı jaǵdaılar óte sırek kezdesedi. Eger der kezinde anyqtalyp, qajetti kómek kórsetilmese, bul ómirge qaýip tóndiretin asqynýlarǵa alyp kelýi múmkin. Qyzǵa aldaǵy ýaqytta medısınalyq baqylaýmen qatar, psıhologıalyq qoldaý da qajet bolady.