Kúrdeli jańǵyrtýdan ótken Saıran kóli jaǵalaýynda «Taza Qazaqstan» respýblıkalyq ekologıalyq aksıasy aıasynda aýqymdy senbilik ótti.
İs-sharanyń maqsaty qoǵamda ekologıalyq mádenıetti qalyptastyrý jáne qorshaǵan ortany qorǵaý máselesine qoǵam nazaryn aýdarý. Igi bastamany ánshiler, akterler, aqyndar men jazýshylar t.b. mádenıet pen óner ókilderi qoldady.
«Saıran kóli – jańaryp, túrlengen demalys aımaǵy. Munda qala turǵyndary men qonaqtary tabıǵat aıasynda tynyǵyp, otbasymen, dostarymen jaqsy ýaqyt ótkize alady», – dedi Almaty ákiminiń orynbasary Azamat Qaldybekov quttyqtaý sózinde.
Senbilikke Qazaqstannyń eńbek sińirgen mádenıet qaıratkeri, belgili estrada ánshisi Jubanysh Jeksenuly, teatr jáne kıno akteri, QR eńbek sińirgen mádenıet qaıratkeri Ulan Núsipáli, QR eńbek sińirgen qaıratkeri Baqyt Týshaev, TÚRKSOI jazýshylar odaǵynyń tóraǵasy Ulyqbek Esdáýlet, QR Jazýshylar odaǵynyń múshesi, qoǵam qaıratkeri Beknur Qısyqov, Almaty sırkiniń artıseri, Gınnestiń rekordtar kitabyna engen akrobattar Batyr Januzaq pen Marlen Maratov qatysty.
Sondaı-aq, is-sharaǵa aqyn Murathan Shoqan, teatr jáne kıno aktrısalary Lıza Serikova men Kamalıa Baıtileýova, ánshiler Tahmına Áshimbekova, Keńes Álimjan, Garıfa Igisinova, Dımash Dáýletov, «Jańa ǵasyr» teatrynyń artıseri jáne ózge de mádenıet qaıratkerleri men óner maıtalmandary qatysty.
Olar jastardy ekologıalyq jaýapkershilikke baýlýdyń mańyzyn erekshe atady.
«Tabıǵat – bizge amanat. Osyndaı kórkem jerlerdiń, jalpy qorshaǵan ortanyń tazalyǵyn saqtaý – keleshek urpaq aldyndaǵy boryshymyz. Barymyzdy baǵalaı bileıik», – dedi QR eńbek sińirgen mádenıet qaıratkeri, belgili ánshi Jubanysh Jeksenuly.
Aktrısa Kamalıa Baıtileýova mundaı ıgi isterdiń turaqty túrde uıymdastyrylady dep senedi.
«Saırandaǵy senbilik qoqys tazalaý sharasy ǵana emes, bul qala turǵyndarynyń qorshaǵan ortaǵa degen jaýapkershiliginiń sımvolyna aınaldy. Osyndaı bastamalar jıilep, Almatynyń kórkeıýine beı-jaı qaramaıtyn azamattar kóbeıe túsedi degen úmittemin», – dedi Kamalıa Baıtileýova.
Teatr jáne kıno akteri Baqyt Týshaev almatylyqtar tabıǵatqa sózben emes, naqty ispen janashyrlyq tanytýy qajet ekenin aıtty.
TÚRKSOI Jazýshylar odaǵynyń tóraǵasy Ulyqbek Esdáýlet ekologıa men qoǵamdyq keńistikterge jaýapkershilikpen qaraý – árbir azamattyń qalany jaıly, qaýipsiz ári tartymdy ortaǵa aınaldyrýǵa qosqan úlesi ekenin aıtty.
«Birlesken kúsh-jigerdiń arqasynda ǵana Almatynyń kórkeıýine baǵyttalǵan ıgi isterdi saqtap, damyta alamyz», – dedi ol.
Juldyzdarmen birge is-sharaǵa «Jasyl el» jasaǵynyń sarbazdary, eriktiler men komúnıtı ortalyqtardyń músheleri – barlyǵy 1000-nan astam adam atsalysty.
Aıta keteıik, búgin Almatynyń barlyq 8 aýdanynda jergilikti ekosenbilikter ótti. Jalpy 11 myńǵa jýyq adam qatysty. 275 arnaıy tehnıka jumyldyrylyp, 1 460 tekshe metrden astam qoqys shyǵaryldy.